തലസ്ഥാനത്ത് വീണ്ടും ഗുണ്ടാ വിളയാട്ടം; വീടിന് മുൻപിൽ ബഹളമുണ്ടാക്കിയത് ചോദ്യം ചെയ്ത് വയോധികനെ വെട്ടിപ്പരിക്കേൽപ്പിച്ച് ഗുണ്ട ഫാന്റം പൈലി

തിരുവനന്തപുരം: ജില്ലയിൽ വീണ്ടും ഗുണ്ടാ ആക്രമണം രൂക്ഷം. വർക്കലയിൽ വയോധികനെ ഗുണ്ടാ നേതാവ് വെട്ടിപ്പരിക്കേൽപ്പിച്ചു. കൂരയ്‌ക്കണ്ണി ആമിന മൻസിലിൽ ഹാഷിമിനാണ് ആക്രമണത്തിൽ പരിക്കേറ്റത്. ഷാജി എന്ന ഫാന്റം പൈലി ആണ് ആക്രമണം നടത്തിയതെന്നാണ് വിവരം.

വർക്കല ബ്ലാക് ബീച്ചിന് സമീപമായിരുന്നു ഹാഷിമിന് നേരെ ആക്രമണം ഉണ്ടായത്. വീടിന് മുൻപിൽവെച്ച് ഷാജി ബഹളമുണ്ടാക്കിയിരുന്നു. ഇത് ഹാഷിം ചോദ്യം ചെയ്തതാണ് ആക്രമണത്തിന് കാരണമായത്.

ഗുരുതരമായി പരിക്കേറ്റ ഹാഷിമിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. നിരവധി കേസുകളിലെ പ്രതിയാണ് ഷാജി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.