ഗാസയിലെ വെടിനിർത്തൽ ! ഉടൻ ചർച്ചയ്ക്ക് തയ്യാറെന്ന് ഹമാസ്; പ്രഖ്യാപനം ബെഞ്ചമിൻ നെതന്യാഹു അമേരിക്കൻ സന്ദർശനം നടത്താനിരിക്കെ

ഗാസ സിറ്റി: ഗാസയിൽ വെടിനിർത്തലിനായുള്ള അമേരിക്കൻ പ്രസിഡന്റ് ഡൊണാൾഡ് ട്രമ്പിന്റെ നിർദ്ദേശത്തിന്മേൽ ഉടനടി ചർച്ചകൾ ആരംഭിക്കാൻ തയ്യാറാണെന്ന് ഹമാസ്. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു തിങ്കളാഴ്ച അമേരിക്കൻ സന്ദർശനം നടത്താനിരിക്കെയാണ് ഹമാസിന്റെ പ്രഖ്യാപനം. എന്നാൽ ഹമാസിന്റെ പുതിയ നിലപാടിനോട് സുരക്ഷാ കാബിനറ്റ് യോഗം ചേർന്ന ശേഷമായിരിക്കും ഇസ്രായേൽ പ്രതികരിക്കുക. ഇസ്രയേലിനെതിരെ ആക്രമണം നടത്താൻ ഹമാസിനെ പിന്തുണച്ചിരുന്ന ഇസ്ലാമിക് ജിഹാദ് വെടിനിർത്തൽ ചർച്ചകളെ പിന്തുണയ്ക്കുന്നതായി അറിയിച്ചു. എന്നാൽ ഗാസയിൽ തടവിലാക്കിയിരിക്കുന്ന ബന്ദികളെ മോചിപ്പിച്ചാൽ ഇസ്രയേൽ തങ്ങളുടെ ആക്രമണം പുനരാരംഭിക്കില്ല എന്നതിന് ഉറപ്പു നൽകണമെന്ന് അവർ ആവശ്യപ്പെട്ടു.

2023 ഒക്ടോബറിൽ 7 ന് ഹമാസ് ഭീകരർ അതിർത്തി വേലികൾ തകർത്ത് ഇസ്രയേലിൽ കടന്നുകയറി 1000 ലേറെ പേരെ കൊലപ്പെടുത്തുകയും 200 ലേറെ പേരെ ബന്ദികളാക്കി പിടിച്ചുകൊണ്ടു പോവുകയും ചെയ്തതിനെ തുടർന്നാണ് ഗാസയിൽ സംഘർഷം ആരംഭിച്ചത്. 251 ബന്ദികളിൽ 49 പേർ ഇപ്പോഴും ഗാസയിൽ തടവിലാണ്. ഇതിൽ 27 പേർ മരിച്ചതായി ഇസ്രയേൽ സൈന്യം പറയുന്നു. ഖത്തർ, ഈജിപ്ത്, അമേരിക്ക എന്നി രാജ്യങ്ങളുടെ മധ്യസ്ഥതയിൽ നടന്ന ചർച്ചയിൽ രണ്ടു തവണ വെടിനിർത്തൽ പ്രഖ്യാപനം നടത്തിയെങ്കിലും ഇതു ഫലവത്തായില്ല. ഇതിനോടൊപ്പം പലസ്തീൻ തടവുകാർക്ക് പകരമായി ഇസ്രയേലി ബന്ദികളിൽ കുറച്ചുപേരെ മോചിപ്പിക്കുകയും ചെയ്തിരുന്നു.