‘ആഴക്കടലിലേക്ക് പോയി പുരാതന ദ്വാരക ന​ഗരത്തെ ദർശിക്കാൻ സാധിച്ചു, പൂവണിഞ്ഞത് ദശാബ്ദങ്ങൾ നീണ്ട മോഹം’; സമുദ്രത്തിനിടയിലെ അനുഭവം പങ്കുവച്ച് പ്രധാനമന്ത്രി

ഗാന്ധിഗഗർ: ആഴക്കടലിലേക്ക് പോയി ദ്വാരക ന​ഗരം ദർശിച്ചതിന്റെ അനുഭവം പങ്കുവച്ച് പ്രധാനമന്ത്രി നരേന്ദ്രമോദി. പുരാതന ​ദ്വാരക ന​ഗരത്തിൽ പോകണമെന്നത് ഏറെക്കാലമായുള്ള ആ​ഗ്രഹമായിരുന്നു എന്ന് മോദി പറഞ്ഞു. ദ്വാരകാധിഷ് ക്ഷേത്രത്തിലെത്തിയ അദ്ദേഹം ദർശനം നടത്തിയതിന് ശേഷമായിരുന്നു സ്കൂബാ ഡൈവിലൂടെ കടലിനടിയിലെ ദ്വാരകാ ന​ഗരം ദർശിച്ചത്. ശേഷം ജനങ്ങളെ അഭിസംബോധന ചെയ്ത അദ്ദേഹം തനിക്ക് ലഭിച്ച സൗഭാ​ഗ്യത്തെക്കുറിച്ച് പങ്കുവെച്ചു.

‘എന്നോടൊപ്പം ഇനിയെന്നെന്നും നിലനിൽക്കുന്ന നിമിഷങ്ങളാണ് ഇന്നെനിക്ക് അനുഭവിക്കാൻ കഴിഞ്ഞത്. ആഴക്കടലിലേക്ക് പോയി പുരാതന ദ്വാരക ന​ഗരത്തെ ദർശിക്കാൻ സാധിച്ചു. സമുദ്രത്തിനടിയിലുള്ള ദ്വാരക ന​ഗരത്തെക്കുറിച്ച് പുരാവസ്തു ​ഗവേഷകർ നിരവധി വസ്തുതകൾ എഴുതിയിട്ടുണ്ട്. ലോകത്തിന്റെ നെറുകയോളം ഉയർന്നുനിൽക്കുന്ന വമ്പൻ കെട്ടിടങ്ങളും അതിമനോഹരമായ കവാടങ്ങളും നിറഞ്ഞതായിരുന്നു ദ്വാരക ന​ഗരമെന്ന് നമ്മുടെ എഴുത്തുകാരും പറഞ്ഞിട്ടുണ്ട്. ഭ​ഗവാൻ ശ്രീകൃഷ്ണൻ നിർമ്മിച്ച ന​ഗരമാണിത്. ആഴക്കടലിലേക്ക് സഞ്ചരിച്ച് അവിടെയെത്തിയപ്പോൾ ആ ദൈവികത എനിക്ക് അനുഭവിക്കാൻ കഴിഞ്ഞു. ദ്വാരകാധിഷന്റെ മുന്നിൽ പ്രണാമം അർപ്പിച്ചു. മയിൽപ്പീലിയുമായാണ് ഞാൻ അവിടേക്ക് പോയത്. ഭ​ഗവാന്റെ പാദങ്ങളിൽ ആ പീലികൾ ഞാൻ സമർപ്പിച്ചു. പുരാതന ​ദ്വാരക ന​ഗരത്തിൽ പോകണമെന്നത് ഏറെക്കാലമായുള്ള ആ​ഗ്രഹമായിരുന്നു. വലിയ ആകാംക്ഷയിലായിരുന്നു ഞാൻ. ഇന്ന് അവിടെയെത്തി പുരാതന ന​ഗരിയിലെ ശേഷിപ്പുകളിൽ സ്പർശിക്കാൻ കഴിഞ്ഞു. ദശാബ്ദങ്ങൾ നീണ്ട സ്വപ്നമാണ് ഇന്ന് യാഥാർത്ഥ്യമായത്’ എന്ന് ദ്വാരകയിലെ ജനങ്ങളോട് പ്രധാനമന്ത്രി പറഞ്ഞു.