സ്വർണ്ണക്കടത്ത് ! രന്യ റാവു പിടിയിലായത് ദീർഘ കാലത്തെ നിരീക്ഷണത്തിന് ശേഷം; ഒരേ വസ്ത്രത്തിൽ രണ്ടാഴ്ചക്കിടെ നടി നടത്തിയത് 4 ദുബായ് യാത്രകൾ

ബെംഗളൂരു: സ്വര്‍ണക്കടത്ത് കേസില്‍ നടി രന്യ റാവുവിനെ ഡയറക്ടറേറ്റ് ഓഫ് റവന്യൂ ഇന്റലിജന്‍സ് വലയിലാക്കിയത് ദീർഘകാലത്തെ നിരീക്ഷണത്തിന് ശേഷം. രണ്ടാഴ്ചക്കിടെ നാലുതവണ നടി നടത്തിയ ദുബായ് യാത്രയും ഇതിനൊപ്പം ലഭിച്ച രഹസ്യ വിവരവും നിർണ്ണായകമായി. യാത്രാസമയത്ത് നടി ധരിച്ചിരുന്നത് ഒരേ വസ്ത്രങ്ങളായിരുന്നു. പിന്നാലെയാണ് ദുബായില്‍നിന്നെത്തിയ നടിയെ സ്വര്‍ണവുമായി ഡിആര്‍ഐ സംഘം കൈയോടെ പിടികൂടിയത്.

സുരക്ഷാപരിശോധനകള്‍ കഴിഞ്ഞ് പുറത്തിറങ്ങാന്‍ ഒരുങ്ങുന്നതിനിടെയാണ് നടിയെ ഡിആര്‍ഐ സംഘം വളഞ്ഞത്. പരിശോധനയില്‍ 12.56 കോടി രൂപ വിലവരുന്ന 14.2 കിലോ സ്വര്‍ണം ഒളിപ്പിച്ചനിലയില്‍ നടിയില്‍നിന്ന് കണ്ടെടുത്തു. ഇതിന് പിന്നാലെ ബെംഗളൂരു ലാവല്ലെ റോഡിലെ നടിയുടെ വീട്ടിലും ഡിആര്‍ സംഘം പരിശോധന നടത്തി. ഇവിടെ നിന്ന് 2.06 കോടി രൂപയുടെ സ്വര്‍ണാഭരണങ്ങളും 2.67 കോടി രൂപയും പിടിച്ചെടുത്തു. നടിയില്‍നിന്ന് ആകെ 14.8 കിലോ സ്വര്‍ണമാണ് പരിശോധനയില്‍ പിടികൂടിയത്.

കര്‍ണാടകയിലെ ഐപിഎസ്. ഉദ്യോഗസ്ഥനായ കെ. രാമചന്ദ്ര റാവുവിന്റെ രണ്ടാംഭാര്യയുടെ മകളാണ് രന്യ റാവു. ഈ സ്ത്രീയുടെ ആദ്യവിവാഹത്തിലെ രണ്ടുമക്കളില്‍ ഒരാളാണ് രന്യ റാവു. 2014-ലാണ് രന്യ റാവു കന്നഡ സിനിമയില്‍ അരങ്ങേറ്റം കുറിക്കുന്നത്. മാണിക്യ എന്ന കന്നഡ ചിത്രത്തിലാണ് നടി ആദ്യമായി അഭിനയിച്ചത്. അതേസമയം, രന്യ റാവുവുമായി നിലവില്‍ ബന്ധമില്ലെന്ന് ഐപിഎസ് ഉദ്യോഗസ്ഥനായ പിതാവ് പറഞ്ഞു.