കിട്ടിയത് എട്ടിന്റെ അല്ല പതിനാറിന്റെ പണി! ജീവനാംശ തുക ചോദിച്ച ഭാര്യക്ക് നൽകിയത് ഏഴ് ചാക്കുകളിലായി നാണയങ്ങള്‍; ഒടുവിൽ പൊല്ലാപ്പിലായി യുവാവ്, വിചിത്ര ഉത്തരവ് ജയ്പൂർ അഡീഷണൽ ജില്ലാ കോടതിയുടേത്

ജയ്പൂര്‍: ജീവനാംശം തേടി ഭര്‍ത്താവിനെതിരെ കോടതയിലെത്തിയ ഭാര്യക്ക് ഏഴ് ചാക്കുകളിലായി നാണയങ്ങള്‍ നൽകി ഭർത്താവിന്റെ എട്ടിന്റെ പണി. രാജസ്ഥാനിലെ ജയ്പൂർ അഡീഷണൽ ജില്ലാ കോടതിയിലാണ് വിചിത്ര സംഭവം. പതിന്നൊന്ന് മാസം ജീവനാംശമായി നല്‍കേണ്ട തുക നല്‍കാതെ വന്നതോടെയാണ് ജയ്പൂര്‍ സ്വദേശിനി സീമ കോടതിയിലെത്തിയത്. ഭര്‍ത്താവ് ദശരഥ കുമാവതിനെ സംഭവത്തില്‍ പോലീസ് അറസ്റ്റ് ചെയ്തു. ജൂണ്‍ 17നായിരുന്നു ഇയാളെ അറസ്റ്റ് ചെയ്തത്.

ഇതോടെ ഇയാളുടെ വീട്ടുകാര്‍ നഷ്ടപരിഹാരത്തുക നാണയ രൂപത്തില്‍ ഏഴ് ചാക്കുകളിലാക്കി കോടതിയില്‍ എത്തിക്കുകയായിരുന്നു. വിവാഹ മോചന ഹര്‍ജി പരിഗണിക്കുന്ന സമയത്ത് മാസം തോറും സീമയ്ക്ക് 5000 രൂപ നല്‍കണമെന്നാണ് കോടതി നിര്‍ദ്ദേശിച്ചിരുന്നത്. എന്നാല്‍ കോടതിയുടെ നടപടി യുവാവിന് കൊടുത്തത് പതിനാറിന്റെ പണിയായിപ്പോയി!

ജീവനാംശമായ അമ്പത്തി അയ്യായിരം രൂപ ഒരു രൂപയുടേയും രണ്ട് രൂപയുടേയും നാണയങ്ങളായി നൽകാൻ അനുവാദം നല്‍കിയെങ്കിലും ഈ തുക എണ്ണിത്തിട്ടപ്പെടുത്തി നൽകാൻ ഭർത്താവിനോട് കോടതി നിര്‍ദ്ദേശിക്കുകയായിരുന്നു. മാത്രമല്ല ഇത്രയും തുക യുവാവ് തനിയെ എണ്ണിത്തിട്ടപ്പെടുത്തണമെന്നും ആയിരം രൂപ വീതമുള്ള പാക്കറ്റുകളിലാക്കി നല്‍കണമെന്നും കോടതി വ്യക്തമാക്കി. യുവാവ് തന്നെ എണ്ണിത്തിട്ടപ്പെടുത്തി പണം കൈമാറുന്നത് വരെ നാണയങ്ങള്‍ കോടതിയുടെ കസ്റ്റഡിയില്‍ തുടരുമെന്നും കോടതി വ്യക്തമാക്കി.

അടുത്ത ഹിയറിംഗ് തിയതിയായ ജൂണ്‍ 26ന് മുന്‍പ് പണം നല്‍കിയിരിക്കണമെന്നും കോടതി നിര്‍ദ്ദേശിച്ചതോടെ യുവാവ് വെട്ടിലായി. നാണയം നിയമപരമായി ഉപയോഗത്തിലുള്ളതാണെന്നും അത് സ്വീകരിക്കുന്നതിന് തടസം പാടില്ലെന്നുമായിരുന്നു യുവാവിന്‍റെ വീട്ടുകാര്‍ സീമയുടെ അഭിഭാഷകനോട് വിശദമാക്കിയത്.