അസാധാരണ നീക്കം!! ധനമന്ത്രിയെ നീക്കണമെന്ന് ഗവര്‍ണര്‍; മുഖ്യമന്ത്രിക്ക് കത്ത് നല്‍കി

തിരുവനന്തപുരം: ധനമന്ത്രി കെ എന്‍ ബാലഗോപാലിനെ സ്ഥാനത്ത് നിന്ന് നീക്കണമെന്ന് ഗവര്‍ണര്‍. അസാധാരണ നടപടിയില്‍ ഗവര്‍ണര്‍ മുഖ്യമന്ത്രിക്ക് കത്ത് കൈമാറി. ധനമന്ത്രിയുടെ പ്രീതി നഷ്ടമായെന്ന് കാട്ടിയാണ് ഗവര്‍ണര്‍ ശക്തമായ നിലപാടുമായി രംഗത്ത് എത്തിയിരിക്കുന്നത്.

കഴിഞ്ഞ ആഴ്‌ചയിൽ സർക്കാരുമായുള്ള കടുത്ത പോരിനിടയിൽ തന്റെ പദവിയുടെ അന്തസ്സിനെ അവഹേളിക്കുന്നവിധം സംസാരിച്ചാൽ മന്ത്രിമാരെ നീക്കുന്നതുൾപ്പെടെയുള്ള നടപടികളുണ്ടാവുമെന്ന് അദ്ദേഹം പ്രഖ്യാപിച്ചിരുന്നു. ‘‘മുഖ്യമന്ത്രിക്കും മന്ത്രിമാർക്കും ഗവർണറെ ഉപദേശിക്കാനുള്ള എല്ലാ അവകാശവുമുണ്ട്. എന്നാൽ, ഗവർണർപദവിയുടെ അന്തസ്സിനെ ഇകഴ്ത്തുന്ന പ്രസ്താവനകൾ മന്ത്രിമാർ നടത്തിയാൽ ഗവർണറുടെ സമ്മതി പിൻവലിക്കുന്നതുൾപ്പെടെയുള്ള നടപടികളുണ്ടാവും’’ -ഇതായിരുന്നു സാമൂഹികമാധ്യമമായ ട്വിറ്ററിലൂടെ നടത്തിയ പ്രഖ്യാപനം.