ആളത്ര വെടിപ്പല്ലല്ലോ !..ചാടിപ്പോയ ഹനുമാൻ കുരങ്ങ് ഒടുവിൽ വലയിൽ; പിടികൂടിയത് ജർമൻ സാംസ്കാരിക കേന്ദ്രത്തിന്റെ ശുചിമുറിയിൽ‌നിന്ന്

തിരുവനന്തപുരം :അധികൃതർക്ക് തലവേദനയുണ്ടാക്കി മൃഗശാലയിൽനിന്നു ചാടിപ്പോയ ഹനുമാൻ കുരങ്ങിനെ പിടികൂടി. ജർമൻ സാംസ്കാരിക കേന്ദ്രത്തിന്റെ ശുചിമുറിയിൽനിന്നാണു കുരങ്ങിനെ പിടികൂടിയത്. ജർമൻ സാംസ്കാരിക നിലയത്തിലെ അധികൃതർ വിവരമറിയച്ചതിനെത്തുടർന്ന് സ്ഥലത്തെത്തിയ മൃഗശാല അധികൃതർ വല ഉപയോഗിച്ച് കുരങ്ങിനെ പിടിച്ചു.

നഗരത്തിന്റെ വിവിധ ഭാഗങ്ങളിലെ മരങ്ങളിലേക്ക് മാറിയ കുരങ്ങ് രണ്ട് ദിവസമായി തകർത്ത് പെയ്യുന്ന കനത്ത കാലവർഷത്തെത്തുടർന്നാണ് ജർമൻ സാംസ്കാരിക നിലയം പ്രവർത്തിക്കുന്ന കെട്ടിടത്തിൽ അഭയം തേടിയതെന്നാണ് കരുതുന്നത്. തിരുപ്പതിയിൽനിന്ന് എത്തിച്ച കുരങ്ങൻമാരെ ഒരാഴ്ച കൂട്ടിൽ പാർപ്പിച്ചശേഷം മൃഗസംരക്ഷണ മന്ത്രിയുടെ സാന്നിധ്യത്തിൽ തുറന്ന കൂട്ടിലേക്കു വിടാനായിരുന്നു പദ്ധതി. ഇതിനിടെയാണ് പെൺ കുരങ്ങ് ചാടിപ്പോയത്.

പിന്നീട് കണ്ടത് കുരങ്ങ് അധികൃതരെ കുരങ്ങു കളിപ്പിക്കുന്നതാണ്. കുറച്ചുനേരം കൂട്ടിലിരുന്നശേഷം തൊട്ടടുത്ത മരത്തിലേക്കു കുരങ്ങ് കയറി. പിന്നീട് മ്യൂസിയം കോംപൗണ്ടിനു പുറത്തുള്ള മരത്തിൽ ഇരുന്നശേഷം തിരികെയെത്തി. പിന്നീട് ഒന്നര ദിവസത്തോളം മ്യൂസിയം കോംപൗണ്ടിലെ മരത്തിലിരുന്നു. ശേഷം കുരങ്ങ് മാസ്ക്കറ്റ് ഹോട്ടലിന്റെ ഭാഗത്തേക്കു പോയി. പബ്ലിക് ലൈബ്രറിക്ക് സമീപത്തെ മരത്തിലിരുന്ന കുരങ്ങിനെ പിന്നീട് കാണാതാവുകയായിരുന്നു.