ആദ്യം റെയിൽവേ ഭൂമിയിൽ മോസ്‌ക് പണിതു; ഹൈക്കോടതി ഇടപെട്ട് പൊളിച്ച് നീക്കിയതോടെ പുറമ്പോക്ക് കയ്യേറി നിർമ്മാണ പ്രവർത്തനം; പ്രതിഷേധത്തെ തുടർന്ന് ലക്‌സാറിലെ അനധികൃത മോസ്‌ക് പൊളിച്ച് ഹരിദ്വാർ ജില്ലാ ഭരണകൂടം

ഹരിദ്വാർ: അനധികൃതമായി പണിതുകൊണ്ടിരിക്കുന്ന മോസ്‌ക് പൊളിച്ച് ജില്ലാ ഭരണകൂടം. ഹരിദ്വാറിലെ ലക്‌സാറിലാണ് വലിയ പ്രതിഷേധം ഉയർന്നതിനെ തുടർന്ന് പുറമ്പോക്ക് ഭൂമിയിൽ നിർമ്മാണത്തിലിരിക്കുന്ന പള്ളി വൻ സുരക്ഷയിൽ പൊളിച്ചു നീക്കിയത്. പുറമ്പോക്ക് ഭൂമിയിൽ അനധികൃതമായാണ് നിർമ്മാണ പ്രവർത്തനങ്ങൾ നടന്നിരുന്നതെന്ന് തഹസിൽദാർ പ്രതാപ് സിംഗ് ചൗഹാൻ അറിയിച്ചു. ഹിന്ദു ജാഗരൺ മഞ്ചിന്റെ നേതൃത്വത്തിൽ സ്ഥലത്ത് വലിയ പ്രതിഷേധം അനധികൃത പള്ളി നിർമ്മാണത്തിനെതിരെ നടന്നിരുന്നു. സബ് ഡിവിഷണൽ മജിസ്‌ട്രേറ്റിന് ലഭിച്ച പരാതിയുടെ അടിസ്ഥാനത്തിൽ നടന്ന അന്വേഷണത്തിൽ നിർമ്മാണം അനധികൃതമെന്ന് കണ്ടെത്തിയിരുന്നു.

പരാതി ലഭിച്ചയുടൻ പള്ളി അധികൃതരോട് നിർമ്മാണം നിർത്തിവയ്ക്കാൻ ജില്ലാ ഭരണകൂടം ആവശ്യപ്പെട്ടിരുന്നു. എന്നാൽ അവർ അതനുസരിക്കാൻ തയ്യാറായിരുന്നില്ല. നിർമ്മാണത്തിന് അനുമതിയുണ്ടെന്ന് പറഞ്ഞ പള്ളിക്കമ്മറ്റിക്ക് പക്ഷെ രേഖകൾ ഹാജരാക്കാൻ സാധിച്ചിരുന്നില്ല. തുടർന്ന് വൻ പോലീസ് സുരക്ഷയിൽ മോസ്‌ക് പൊളിക്കുകയായിരുന്നു. ഏതാനും വർഷങ്ങൾക്ക് മുമ്പ് പള്ളിക്കമ്മിറ്റി റെയിൽവേ ഭൂമി കയ്യേറി മോസ്‌ക് നിർമ്മിച്ചിരുന്നു. എന്നാൽ ഹൈക്കോടതി ഇടപെട്ട് അത് പൊളിച്ചു മാറ്റിയിരുന്നു. തുടർന്നാണ് ഇവർ പുറമ്പോക്ക് കയ്യേറി മോസ്‌ക് നിർമ്മിച്ചതെന്ന് ഹിന്ദു സംഘടനകൾ ആരോപിക്കുന്നു. ഇതിനെ തുടർന്നാണ് സ്ഥലത്ത് അനധികൃത നിർമ്മാണത്തിനെതിരെ പ്രതിഷേധം ആരംഭിച്ചത്.