അഴികള്‍ മുറിച്ച് മാറ്റി ഊർന്നിറങ്ങി !പുറത്തേക്ക് കടന്നത് അഴികള്‍ യഥാസ്ഥാനത്ത് തിരികെ വച്ചശേഷം ! ഗോവിന്ദച്ചാമി ജയിൽ ചാടുന്നതിന്റെ ദൃശ്യങ്ങൾ പുറത്ത് ; ജയിൽ വകുപ്പിനും ഉദ്യോഗസ്ഥർക്കും ഉണ്ടായത് ഗുരുതര വീഴ്ച

കണ്ണൂര്‍ : കൊടുംകുറ്റവാളി ഗോവിന്ദച്ചാമി കണ്ണൂർ സെൻട്രൽ ജയിലിൽ നിന്ന് പുറത്തു ചാടുന്ന ദൃശ്യങ്ങള്‍ പുറത്ത്. ജയിലിലെ പത്താം നമ്പര്‍ ബ്ലോക്കിലെ സെല്ലിന്റെ അഴികള്‍ മുറിച്ച് മാറ്റിയ ശേഷം ഇയാൾ പുറത്തേക്ക് ഇഴഞ്ഞ് ഇറങ്ങുന്നത് ദൃശ്യങ്ങളില്‍ നിന്ന് വ്യക്തമാണ്. പുറത്തിറങ്ങിയ ശേഷം അഴികള്‍ തിരികെ ശേഷമാണ് പുറത്തേക്ക് കടക്കുന്നത്. മാസങ്ങളോളം ആഹാരക്രമത്തിൽ മാറ്റം വരുത്തി ശരീരം മെലിഞ്ഞിരുന്നതിനാൽ ഗോവിന്ദച്ചാമിക്ക് എളുപ്പത്തിൽ അഴികൾക്കിടയിലൂടെ പുറത്തേക്ക് കടക്കാനും സാധിച്ചു. സെല്ലിലെ കമ്പി മുറിച്ച് പുറത്തിറങ്ങിയ ശേഷം വലിയ ചുറ്റു മതില്‍ തുണികള്‍ കൂട്ടിക്കെട്ടിയാണ് ചാടിക്കടന്നത്.

പുലര്‍ച്ചെ നാലേകാല്‍വരെ ജയില്‍ വളപ്പിനുള്ളിലെ മരത്തിന് സമീപം നില്‍ക്കുന്നതായി സിസിടിവിയില്‍ വ്യക്തമാണ്. വെള്ളിയാഴ്ച പുലര്‍ച്ചയോടെ ജയില്‍ ചാടിയ ഗോവിന്ദച്ചാമിക്കായി പോലീസ് വ്യാപകമായ തിരച്ചില്‍ നടത്തിയിരുന്നു. പിന്നീടാണ് ഒൻപത് മണിയോടെ തളാപ്പിലെ റോഡില്‍വെച്ച് ഒരു കൈ ഇല്ലാത്ത ഒരാളെ നാട്ടുകാർ സംശയകരമായി കണ്ടെന്ന് വിവരം ലഭിക്കുന്നത്. ഗോവിന്ദച്ചാമീ എന്ന് ഉറക്കെ വിളിച്ചതോടെ ഇയാള്‍ സമീപത്തെ കാടുപിടിച്ച് കിടക്കുന്ന പ്രദേശത്തേക്ക് ഓടി. പ്രദേശത്തുണ്ടായിരുന്നവര്‍ ഉടന്‍ തന്നെ പോലീസില്‍ വിവരം അറിയിച്ചു.പോലീസ് പിറകെയുണ്ടെന്ന വിവരം ലഭിച്ചതോടെ മതില്‍ ചാടി നാഷണല്‍ സ്റ്റാറ്റിസ്റ്റിക്സ് ഓഫീസിന് സമീപത്തേക്കെത്തുകയും കോമ്പൗണ്ടിലെ കിണറ്റിലേക്ക് ചാടുകയുമായിരുന്നു. അവിടെ നിന്നാണ് പോലീസ് ഇയാളെ പിടികൂടിയത്.