ഹൃദയാഘാതത്തെ തുടർന്ന് ആശുപത്രിയിൽ പ്രവേശിപ്പിക്കപ്പെട്ട വി എസ് അച്യുതാനന്ദന്റെ നിലയിൽ നേരിയ പുരോഗതി; മരുന്നുകളോട് പ്രതികരിക്കുന്നുവെന്ന് ഡോക്ടർമാർ; മുഖ്യമന്ത്രി പിണറായി വിജയൻ ആശുപത്രിയിലെത്തി വി എസിനെ കണ്ടു

തിരുവനന്തപുരം: ഹൃദയാഘാതത്തെ തുടർന്ന് പട്ടം എസ്‌ യു ടി ആശുപത്രിയിൽ പ്രവേശിക്കപ്പെട്ട മുൻ മുഖ്യമന്ത്രി വി എസ് അച്യുതാനന്ദന്റെ ആരോഗ്യനിലയിൽ നേരിയ പുരോഗതിയെന്ന് മെഡിക്കൽ ബുള്ളറ്റിൻ. അദ്ദേഹം മരുന്നുകളോട് പ്രതികരിക്കുന്നതായി ഡോക്ടർമാർ അറിയിച്ചു. വാർദ്ധക്യ സഹജമായ അവശതയും ഹൃദയാഘാതം സംഭവിച്ചതിന്റെ ബുദ്ധിമുട്ടുകളും മാത്രമാണുള്ളത്. അദ്ദേഹത്തെ തീവ്രപരിചരണ വിഭാഗത്തിൽ ഡോക്ടർമാർ നിരീക്ഷിച്ചു വരികയാണ്.

ഇന്നലെ ഉച്ചയോടെയാണ് അദ്ദേഹത്തിന് ശ്വാസതടസം അനുഭവപ്പെട്ടത്. തുടർന്ന് ആശുപത്രിയിൽ പ്രവേശിപ്പിച്ചപ്പോൾ ഹൃദയാഘാതം സ്ഥിരീകരിക്കുകയായിരുന്നു. 2019 ൽ പക്ഷാഘാതം സംഭവിച്ചതിനെ തുടർന്ന് വി എസ് മകന്റെ വീട്ടിൽ ചികിത്സയും വിശ്രമവുമായി കഴിയുകയായിരുന്നു. അതിനിടയിലാണ് ആരോഗ്യ നില വഷളായത്

മുഖ്യമന്ത്രി പിണറായി വിജയൻ ആശുപത്രിയിലെത്തി വി എസിനെ കണ്ടു. അദ്ദേഹത്തിന്റെ മകനോട് ആരോഗ്യനിലയുമായി ബന്ധപ്പെട്ട വിവരങ്ങൾ മുഖ്യമന്ത്രി ചോദിച്ചറിഞ്ഞു. സിപിഎം ദേശീയ ജനറൽ സെക്രട്ടറി എം എ ബേബി, സംസ്ഥാന ജനറൽ സെക്രട്ടറി എം വി ഗോവിന്ദൻ, സിപിഐ സംസ്ഥാന സെക്രട്ടറി ബിനോയ് വിശ്വം തുടങ്ങി ഉന്നത നേതാക്കൾ ആശുപത്രിയിൽ വി എസിനെ സന്ദർശിക്കാനെത്തിയിരുന്നു.