ഓണറേറിയം വർധിപ്പിക്കാൻ കഴിയില്ലെന്ന് ആരോഗ്യമന്ത്രി ! ആശാവർക്കർമാരുമായുള്ള ചർച്ച പരാജയം

തിരുവനന്തപുരം : ഓണറേറിയം വര്‍ധിപ്പിക്കുക, വിരമിക്കല്‍ ആനുകൂല്യം നല്‍കുക തുടങ്ങിയ ആവശ്യങ്ങള്‍ ഉന്നയിച്ച് സെക്രട്ടേറിയറ്റിനു മുന്നില്‍ സമരം ചെയ്യുന്ന ആശ വർക്കർമാരുമായി ആരോഗ്യ വകുപ്പ് മന്ത്രി വീണാ ജോര്‍ജ് നടത്തിയ ചർച്ചയും പരാജയപ്പെട്ടു. ഇതോടെ ശക്തമായ സമര നടപടിയുമായി മുന്നോട്ട് പോകുമെന്ന് ആശാ വർക്കർമാർ അറിയിച്ചു.ഓണറേറിയം വർധിപ്പിക്കാൻ കഴിയില്ലെന്ന് ആരോഗ്യമന്ത്രി നിലപടെടുത്തതോടെയാണ് ചർച്ച പരാജയപ്പെട്ടത് .

ചർച്ചയിൽ തീരുമാനമായില്ലെങ്കിൽ നാളെ രാവിലെ 11 മണിക്ക് നിരാഹാര സമരം ആരംഭിക്കുമെന്ന് ആശാ വർക്കർമാർ നേരത്തെ വ്യക്തമാക്കിയിരുന്നു. സർക്കാരിന്റെ സാമ്പത്തിക പ്രയാസം എന്നത് അവിശ്വസനീയമല്ലെന്ന നിലപാടിലാണ് ആശാ വർക്കർമാർ.

എൻഎച്ച്എം മിഷൻ സ്റ്റേറ്റ് കോർഡിനേറ്ററുമായി ഇന്ന് നേരത്തെ നടത്തിയ ചർച്ചയും പരാജയപ്പെട്ടിരുന്നു. സമരക്കാരുടെ ആവശ്യങ്ങളോ ഓണറേറിയത്തിലെ മാനദണ്ഡങ്ങളിലെ പ്രശ്നങ്ങളോ ചർച്ച ചെയ്തില്ല എന്നാണ് വിവരം. സർക്കാർ ഖജനാവിൽ പണമില്ലെന്നും അതിനാൽ സർക്കാറിന് സമയം നൽക ണമെന്നുമാണ് ച ർച്ചയിൽ പ്രധാനമായും സർക്കാർ പ്രതിനിധികൾ പറഞ്ഞത്. സമരത്തിൽ നിന്ന് ആശമാർ ​പിൻമാറണമെന്നായിരുന്നു ചർച്ചക്കെത്തിയ എൻ.എച്ച്. എം ഡയറക്ടറുടെ പ്രധാന ആവശ്യം. തുടർന്ന് നാളെ നിരാഹാര സമരം ആരംഭിക്കുമെന്ന് സമരക്കാർ പ്രഖ്യാപിച്ചതിന് പിന്നാലെയാണ് ആരോഗ്യമന്ത്രി ചർച്ചക്ക് തയ്യാറായത്.