47 വർഷത്തിനിടെ ഉണ്ടാകുന്ന ഏറ്റവും ശക്തമായ മഴ ; ചെന്നൈയിൽ മഴ തുടരുന്നു ; 5 മരണം

ചെന്നൈ : മിഗ്ജൗമ് ചുഴലിക്കാറ്റ് അതിതീവ്ര ചുഴലിക്കാറ്റായതോടെ തമിഴ്‌നാട്ടിലും ആന്ധ്രയിലും അതീവ ജാഗ്രതാ നിർദേശം തുടരുന്നു. ചെന്നൈ നഗരത്തിൽ കനത്ത മഴ ഇപ്പോഴും സർവ്വനാശം വിതയ്ക്കുകയാണ്. 5 പേർക്കാണ് മഴക്കെടുതിയിൽ ജീവൻ നഷ്ടമായിരിക്കുന്നത്. കാഞ്ചീപുരം, ചെങ്കൽപ്പെട്ട്, തിരുവള്ളൂർ തുടങ്ങിയ സമീപ ജില്ലകളിലും ജനജീവിതം താറുമാറായ അവസ്ഥയിലാണ്.

അതേസമയം, ആയിരത്തിലേറെ പേരെ ക്യാമ്പുകളിലേക്ക് മാറ്റിയിട്ടുണ്ട്. റോഡുകളിൽ അഞ്ചടിവരെ വെള്ളം കയറിയിരിക്കുകയാണ്. മരങ്ങൾ കടപുഴകി വീണ് ഗതാഗതവും വൈദ്യുതിയും നിലച്ചിരിക്കുകയാണ്. വെള്ളം നിറഞ്ഞ നഗരത്തിലെ എല്ലാ അടിപ്പാതകളും അടച്ചു. നഗരത്തിലെ ഭൂരിഭാഗം മേഖലയും വെള്ളത്തിനടിയിലായിരിക്കുകയാണ്. കൂടാതെ, റെയിൽ, റോഡ്, വ്യോമഗതാഗതം എന്നിവ സ്തംഭിച്ച നിലയിലാണ്.

വൈദ്യുതി മുടങ്ങിയതോടെ നഗരം ഇരുട്ടിലായിരിക്കുകയാണ്. അതേസമയം, 47 വർഷത്തിനിടെ ഉണ്ടാകുന്ന ഏറ്റവും ശക്തമായ മഴയാണ് ചെന്നൈയിൽ ലഭിക്കുന്നത്. കനത്ത മഴയെത്തുടർന്ന് വന്ദേ ഭാരത് അടക്കം 6 ട്രെയിനുകൾ കൂടി റദ്ദാക്കിയിട്ടുണ്ട്. ചെന്നൈ – കൊല്ലം ട്രെയിനും റദ്ദാക്കിയതിൽ ഉൾപ്പെടുന്നു.