കടുത്ത മദ്യപാനത്തെ തുടർന്ന് ഭാര്യ പിണങ്ങിപ്പോയി; ആ വിഷമത്തിൽ മദ്യപിച്ചെത്തി ഹൈ– വോൾട്ടേജ് വയറിൽ കടിച്ച യുവാവിന് ഗുരുതരമായി പൊള്ളലേറ്റു

ചെന്നൈ ∙ കടുത്ത മദ്യപാനത്തെത്തുടർന്ന് ഭാര്യപിണങ്ങിപ്പോയ വിഷമത്തിൽ മദ്യപിച്ചെത്തി ട്രാന്‍സ്ഫോമറിനു മുകളില്‍ കയറി ഹൈ– വോൾട്ടേജ് വയറിൽ കടിച്ച യുവാവിന് ഗുരുതരമായി പൊള്ളലേറ്റു . തമിഴ്നാട്ടിലെ തിരുവള്ളൂര്‍ ജില്ലയിലാണ് വിചിത്ര സംഭവം അരങ്ങേറിയത്. ചിന്നമങ്കോട് സ്വദേശിയായ ധർമദുരൈയ്ക്ക് ഗുരുതരമായി പൊള്ളലേറ്റത് . ഭാര്യ വഴക്കിട്ട് സ്വന്തം ഗ്രാമമായ റെഡ്ഡിപാളയത്തേക്ക് പോയതിൽ അസ്വസ്ഥനായിരുന്നു ഇയാൾ. ഭാര്യയെ തിരികെഎത്തിക്കാനായി ഭാര്യാസഹോദരന്മാർക്കെതിരെ പരാതി നൽകാൻ ധർമദുരൈ പലതവണ ആറമ്പാക്കം പോലീസ് സ്റ്റേഷൻ സമീപിച്ചിരുന്നതായാണ് വിവരം.

ഇന്നലെ ധർമദുരൈ പൊലീസ് സ്റ്റേഷനിൽ എത്തിയ ഇയാളോട് വെയ്റ്റിങ് റൂമിൽ ഇരിക്കാൻ പോലീസ് ആവശ്യപ്പെട്ടെങ്കിലും പെട്ടെന്ന് യുവാവ് പൊലീസ് സ്റ്റേഷൻ വളപ്പിൽനിന്ന് പുറത്തിറങ്ങി കെട്ടിടത്തിന് എതിർവശത്തുള്ള ട്രാൻസ്‌ഫോമറിൽ കയറുകയായിരുന്നു. ആളുകള്‍ ഇയാളോട് താഴെയിറങ്ങാന്‍ ആവശ്യപ്പെട്ടെങ്കിലും ഇയാൾ ഹൈവോൾട്ടെജ് വയറിൽ കടിക്കുകയായിരുന്നുവെന്ന് പൊലീസ് പറഞ്ഞു.

ഗുരുതരമായി പൊള്ളലേറ്റ ധർമദുരൈയെ എളവൂർ ആശുപത്രിയിലും തുടർന്ന് കിൽപ്പോക്ക് സർക്കാർ ആശുപത്രിയിലും പ്രവേശിപ്പിച്ചു. ഇയാളുടെ നില ഗുരുതരമായി തുടരുകയാണ്