സംഭവ ബഹുലം !ലക്നൗ ഡഗൗട്ടിലേക്ക് നട്ടും ബോൾട്ടും എറിഞ്ഞ് ഹൈദരാബാദ് ആരാധകർ; ഗംഭീറിനെതിരെ ‘കോഹ്ലി’ വിളികൾ‘

ഹൈദരാബാദ് : ഐപിഎലിൽ ഇന്നലെ നടന്ന സൺറൈസേഴ്സ് ഹൈദരാബാദ്– ലക്നൗ സൂപ്പർ ജയ്ന്റ്സ് മത്സരത്തിൽ അരങ്ങേറിയത് ഐപിഎൽ ചരിത്രത്തിൽ ഇത് വരെയും അരങ്ങേറാത്ത സംഭവങ്ങൾ. മത്സരത്തിലെ ‘നോ ബോൾ’ വിവാദമാണ് തുടർന്നുള്ള സംഭവങ്ങളിലേക്ക് നയിച്ചത്. മത്സരത്തിൽ ആദ്യം ബാറ്റു ചെയ്ത ഹൈദരാബാദ് ഇന്നിങ്സിന്റെ 19–ാം ഓവറിലായിരുന്നു സംഭവം. അബ്ദുൽ സമദിനെതിരെ ആവേശ് ഖാൻ എറിഞ്ഞ ഫുൾ ടോസ് പന്തിനു ഫീൽഡ് അംപയർമാർ നോ ബോൾ അനുവദിച്ചു. എന്നാൽ അംപയറുടെ തീരുമാനം ലക്നൗ ടീം റിവ്യൂ ചെയ്തു. റിവ്യൂവിൽ തേ‍ഡ് അംപയർ ലക്നൗവിന് അനുകൂലമായ നിലപാട് എടുത്തതോടെയാണ് പ്രശ്നങ്ങൾ ആരംഭിച്ചത്.

ഇതിനെതിരെ ഹൈദരാബാദ് ബാറ്റർ ഹെൻറിച്ച് ക്ലാസൻ ഫീൽഡ് അംപയർമാരോട് കയർത്തു. തുടർന്ന് , ഹൈദരാബാദ് ആരാധകർ ഗാലറിയിൽനിന്നു ലക്നൗ ടീം ഇരിക്കുന്ന ഡഗൗട്ടിലേക്ക് നട്ടും ബോൾട്ടും ഉൾപ്പെടെയുള്ള സാധനങ്ങൾ വലിച്ചെറിഞ്ഞതായാണ് പരാതി. തുടർന്ന് ലക്നൗ മുഖ്യപരിശീലകൻ ആന്റി ഫ്ലവർ, മെന്റർ ഗൗതം ഗംഭീർ, മറ്റു താരങ്ങൾ ഉൾപ്പെടെയുള്ളവർ ഗ്രൗണ്ടിലേക്ക് ഇറങ്ങി. ഇതോടെ മത്സരം തടസ്സപ്പെട്ടു. ഓൺ ഫീൽഡ് അംപയർമാർ എത്തി ഇവരുമായി സംസാരിച്ചാണ് കാര്യങ്ങൾ ശാന്തമാക്കിയത്. ഇതിനിടെയാണ് ഗൗതം ഗംഭീറിനെ പ്രകോപിപ്പിക്കുവാൻ ആരാധകർ ‘കോഹ്ലി കോഹ്ലി ’ ചാന്റ് മുഴക്കുകയും ചെയ്തു.

അതെ സമയം ഇന്നലത്തെ മത്സരത്തിൽ ഹൈദരാബാദിനെ 7 വിക്കറ്റിന് ലക്നൗ പരാജയപ്പെടുത്തി. ഹൈദരാബാദ് ഉയർത്തിയ 183 റൺസ് വിജയലക്ഷ്യം 3 വിക്കറ്റ് മാത്രം നഷ്ടപ്പെടുത്തി അവസാന ഓവറിലാണ് ലക്നൗ മറികടന്നത്