“ഇനി ഒരിക്കലും പൂട്ടരുതേ എന്ന പ്രാർത്ഥന മാത്രം !!”: പൊൻകുന്നം ബെവ്കോ ഔട്ട്ലെറ്റ് വീണ്ടും തുറന്നു; വെറ്റിലയിൽ അടയ്ക്കയും പണവും ദക്ഷിണ നൽകി ആദ്യ മദ്യക്കുപ്പി സ്വീകരിച്ച് യുവാവ്

പൊൻകുന്നം: ഒരു വർഷത്തോളം നീണ്ട കാത്തിരിപ്പിന് ശേഷം പൊൻകുന്നത്തെ ബെവ്കോ ഔട്ട്ലെറ്റ് വീണ്ടും തുറന്നു. ഏറെനാളത്തെ ഈ ആഗ്രഹം സഫലമായതിന്റെ സന്തോഷത്തിൽ, ബെവ്കോ ജീവനക്കാരന് ദക്ഷിണ നൽകിയാണ് പ്രദേശവാസിയായ യുവാവ് ആദ്യത്തെ മദ്യക്കുപ്പി സ്വന്തമാക്കിയത്. വെറ്റിലയിൽ അടയ്ക്കയും പണവും വെച്ചാണ് ഇയാൾ ഈ ആചാരപരമായ നീക്കം നടത്തിയത്.

സാങ്കേതിക കാരണങ്ങളെത്തുടർന്ന് ഒരു വർഷം മുമ്പാണ് പൊൻകുന്നത്തെ ബെവ്കോ ഔട്ട്ലെറ്റ് അടച്ചുപൂട്ടിയത്. ഇതോടെ, മദ്യം വാങ്ങുന്നതിനായി പ്രദേശവാസികൾക്ക് പാല, എരുമേലി, പള്ളിക്കത്തോട് തുടങ്ങിയ സ്ഥലങ്ങളിൽ ദീർഘദൂരം യാത്ര ചെയ്യേണ്ടിവന്നിരുന്നു. തിങ്കളാഴ്ച രാവിലെ ഔട്ട്ലെറ്റ് വീണ്ടും തുറന്നപ്പോൾ, നെറ്റിയിൽ ഭസ്മക്കുറിയണിഞ്ഞ്, ദക്ഷിണയുമായിട്ടാണ് രഞ്ജു എന്ന യുവാവ് ആദ്യത്തെ കുപ്പി വാങ്ങാൻ എത്തിയത്. “ഇനി ഈ ഔട്ട്ലെറ്റ് പൂട്ടരുതേ” എന്ന് തങ്ങളെല്ലാം പ്രാർത്ഥിക്കുന്നതായി ഉദ്ഘാടനത്തിനെത്തിയ മറ്റു ആളുകളും പറഞ്ഞു. ഈ സംഭവം സാമൂഹിക മാദ്ധ്യമങ്ങളിലും വലിയ ചർച്ചയായിട്ടുണ്ട്.