“ആലപ്പുഴ ഹൈബ്രിഡ് കഞ്ചാവ് കേസ് പ്രതി തസ്ലിമ സുൽത്താനയെ അറിയാം !” തത്തയെ പോലെ സത്യങ്ങൾ മൊഴിഞ്ഞ് ഷൈൻ ; കൂടുതൽ കേസുകളിൽ ചോദ്യം ചെയ്തേക്കും

ആലപ്പുഴ ഹൈബ്രിഡ് കഞ്ചാവ് കേസ് പ്രതി തസ്ലിമ സുൽത്താനയെ അറിയാമെന്ന് നടൻ ഷൈൻ ടോം ചാക്കോയുടെ മൊഴി. പലതവണ ഇവരെ ഫോണിൽ ബന്ധപ്പെട്ടിരുന്നതായും താൻ ലഹരി ഉപയോഗിക്കുന്ന ആളാണെന്നും നടൻ സമ്മതിച്ചിട്ടുണ്ട്. എന്നാൽ പോലീസിനെ കണ്ട് ഹോട്ടലിൽ നിന്ന് ഓടി രക്ഷപ്പെട്ട ദിവസം ലഹരി ഉപയോഗിച്ചിട്ടില്ലെന്നാണ് മൊഴി. ഉപയോഗിക്കുന്നത് മെത്താഫെറ്റമിനും കഞ്ചാവുമാണ്. സിനിമാ പ്രവർത്തകരാണ് ലഹരി എത്തിച്ച് നൽകുന്നത്. ഒരു വർഷം മുമ്പ് കൂത്താട്ടുകുളത്തെ കേന്ദ്രത്തിൽ ചികിത്സ തേടിയിരുന്നതായും മൊഴിയിൽ പറയുന്നു.

ലഹരി ഇടപാടുകാരെ അറിയില്ലെന്ന നിലപാടിൽ ഉറച്ചു നിന്ന ഷൈൻ ടോം ചാക്കോയ്ക്ക് ഒടുവിൽ തിരുത്തി പറയേണ്ടി വന്നത് ഫോണ്‍വിളി വിവരങ്ങളും സന്ദേശങ്ങളും ഉള്‍പ്പെടെയുള്ള തെളിവുകൾ നിരത്തി പോലീസ് ചോദ്യങ്ങൾ ഉന്നയിച്ചതോടെയാണ്. ലഹരി ഇടപാടുകാരനായ സജീറുമായി ഷൈന്‍ ടോം ചാക്കോ ഗൂഗിള്‍ പേ വഴി സാമ്പത്തിക ഇടപാടുകള്‍ നടത്തിയതിന്റെയും ആശയവിനിമയം നടത്തിയതിന്റെയും തെളിവുകളാണ് പോലീസ് കണ്ടെത്തിയത്. ഇത് മുന്നോട്ട് വച്ചതോടെ നടന് പിടിച്ചുനില്‍ക്കാനായില്ല. ലഹരി ഇടപാടുകാരൻ സജീറിനെ പരിചയമുണ്ടെന്ന് നടന്‍ സമ്മതിച്ചു.