അനധികൃത സ്വത്ത് സമ്പാദനം ! ഡി കെ ശിവകുമാറിന് കനത്ത തിരിച്ചടി ; സിബിഐ രജിസ്റ്റർ ചെയ്ത കേസ് റദ്ദാക്കണമെന്ന ഹർജി തള്ളി സുപ്രീംകോടതി

ദില്ലി : അനധികൃത സ്വത്ത് സമ്പാദനക്കേസിൽ കർണാടക ഉപമുഖ്യമന്ത്രിയും കോൺഗ്രസ് നേതാവുമായ ഡി കെ ശിവകുമാറിന് കനത്ത തിരിച്ചടി. അനധികൃത സ്വത്ത് സമ്പാദനവുമായി ബന്ധപ്പെട്ട് സിബിഐ രജിസ്റ്റർ ചെയ്ത കേസ് റദ്ദാക്കണമെന്ന ശിവകുമാറിന്റെ ഹർജി ജസ്റ്റിസുമാരായ ബേല എം ത്രിവേദി, എസ്‌ സി ശർമ എന്നിവരടങ്ങിയ സുപ്രീം കോടതി ഡിവിഷൻ ബഞ്ച് തള്ളി. ഇത് സംബന്ധിച്ച കർണാടക ഹൈക്കോടതിയുടെ ഉത്തരവിൽ ഇടപെടാൻ താൽപ്പര്യമില്ലെന്നും ബെഞ്ച് വ്യക്തമാക്കി.

2020 സെപ്തംബർ 3 നാണ് അനധികൃത സ്വത്ത് സമ്പാദനക്കേസിൽ സിബിഐ ഡികെ ശിവകുമാറിനെതിരെ എഫ്ഐആർ രജിസ്റ്റർ ചെയ്തത്. 2013 നും 2018 നും ഇടയിൽ ഡി കെ ശിവകുമാർ അനധികൃതമായി സ്വത്ത് സമ്പാദിച്ചുവെന്നാണ് എഫ്‌ഐആറിൽ പറയുന്നത്. ഈ കാലയളവിൽ കർണാടകയിലെ കോൺഗ്രസ് സർക്കാരിൽ മന്ത്രിയായിരുന്നു ഡി കെ ശിവകുമാർ . മന്ത്രി സ്ഥാനത്തിരുന്നുകൊണ്ട് അധികാര ദുർവിനിയോഗത്തിലൂടെ ഡികെ അനധികൃതമായി സ്വത്ത് സമ്പാദിച്ചുവെന്നാണ് സിബിഐ കണ്ടെത്തിയിരിക്കുന്നത്.കേസിൽ ശിവകുമാറിന് തീഹാർ ജയിലിൽ കിടക്കേണ്ടി വന്നിരുന്നു.

2021 ൽ ശിവകുമാർ ഹൈക്കോടതിയിൽ സിബിഐ കേസ് ചോദ്യം ചെയ്തതെങ്കിലും തിരിച്ചടിയേറ്റിരുന്നു. സിബിഐ കേസ് റദ്ദാക്കണമെന്ന ശിവകുമാറിന്‍റെ ഹർജി 2023 ഒക്ടോബർ 19 ന് കർണാടക ഹൈക്കോടതി തള്ളി. ഈ ഉത്തരവിനെതിരെയാണ് ഡി കെ ശിവകുമാർ ഹർജിയുമായി സുപ്രീംകോടതിയിലെത്തിയത്.