താമരശേരിയിൽ സ്കൂട്ടർ യാത്രികനെ രണ്ട് കാറിലെത്തിയ സംഘം തട്ടിക്കൊണ്ടു പോയി; പോലീസ് കേസെടുത്ത് അന്വേഷണമാരംഭിച്ചു

കോഴിക്കോട്: താമരശേരിയിൽ സ്കൂട്ടർ യാത്രികനെ തട്ടിക്കൊണ്ട് പോയി. താമരശ്ശേരി അവേലം സ്വദേശി അഷറഫിനെയാണ് സംഘം തട്ടിക്കൊണ്ട് പോയത്. കാറിലെത്തിയ സംഘമാണ് സ്‌കൂട്ടർ യാത്രക്കാരനെ താമരശ്ശേരി -മുക്കം റോഡിൽ വെഴുപ്പൂർ സ്കൂളിന് സമീപം വച്ച് തട്ടികൊണ്ടു പോയത്.

ടാറ്റാ സുമോയിലും, മറ്റൊരു കാറിലുമായി എത്തിയ സംഘം സ്കൂട്ടർ തടഞ്ഞു നിർത്തി യാത്രക്കാരനെ കാറിലേക്ക് പിടിച്ച് വലിച്ച് കയറ്റിയത്, റോഡിൽ ഉപേക്ഷിച്ച സ്കൂട്ടർ പിന്നീട് പോലീസ് കസ്റ്റഡിയിലെടുക്കുകയായിരുന്നു.

ഇന്നലെ രാത്രി 9.40 ഓടെയാണ് സംഭവം. പിന്നിൽ കൊടിയത്തൂർ കേന്ദ്രീകരിച്ചുള്ള സംഘമാണെന്നാണ് നിഗമനം. താമരശ്ശേരി പോലീസ് അന്വേഷണം തുടങ്ങി. ഗൾഫിൽ വ്യാപാരിയാണ് അഷ്റഫ്. അവിടെ വച്ചുള്ള സാമ്പത്തിക ഇടപാടുകളാകാം തട്ടിക്കൊണ്ടുപോകലിന് പിന്നിലെന്നാണ് പോലീസിന് ലഭിച്ചിരിക്കുന്ന വിവരം. അഷ്റഫിനെ തട്ടിക്കൊണ്ടുപോയ പ്രതികളെയും ഇവർ ഉപയോഗിച്ച വാഹനങ്ങളും തിരിച്ചറിഞ്ഞെന്നാണ് പോലീസ് പറയുന്നത്.