മഞ്ഞുരുകുന്നു !കനേഡിയൻ പൗരൻമാർക്കുള്ള ഇ-വിസ സർവീസ് പുനരാരംഭിച്ച് ഭാരതം

ദില്ലി : രണ്ട് മാസത്തെ ഇടവേളയ്ക്ക് ശേഷം കനേഡിയൻ പൗരൻമാർക്കുള്ള ഇ-വിസ സർവീസ് പുനരാരംഭിച്ച് ഭാരതം. നിർത്തി വച്ചിരുന്ന എൻട്രി വീസ, ബിസിനസ് വീസ, മെഡിക്കൽ വീസ, കോൺഫറൻസ് വീസ തുടങ്ങിയവ പുനരാരംഭിക്കുമെന്ന് നേരത്തെ അറിയിപ്പുണ്ടായിരുന്നു. ഇന്ത്യ–കാനഡ ബന്ധം വഷളായതിനെത്തുടർന്ന് കനേഡിയൻ പൗരന്മാർക്കുള്ള വീസ സർവീസുകൾ രാജ്യം നിർത്തിവച്ചിരിക്കുകയായിരുന്നു. ഖാലിസ്ഥാൻ തീവ്രവാദി നേതാവ് ഹർദീപ് സിങ് നിജ്ജാറിന്റെ കൊലപാതകത്തിൽ ഭാരതത്തിന്റെ രഹസ്യാന്വേഷണ ഉദ്യോഗസ്ഥർക്ക് ബന്ധമുണ്ടെന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ വെളിപ്പെടുത്തലിനെത്തുടർന്നാണ് ഇരുരാജ്യങ്ങളും തമ്മിലുള്ള ബന്ധം വഷളായത്. സെപ്റ്റംബർ 21നായിരുന്നു അനിശ്ചിത കാലത്തേക്കുള്ള നിർത്തിവയ്ക്കൽ നടപടി പ്രാബല്യത്തിൽ വന്നത്.

പിന്നാലെ 21 പേര്‍ ഒഴിച്ചുള്ളവരുടെ നയതന്ത്ര പരിരക്ഷ പിന്‍വലിക്കുമെന്ന് ഇന്ത്യ നേരത്തെ കാനഡയ്ക്ക് മുന്നറിയിപ്പ് നല്‍കിയതിനെത്തുടർന്ന് 41 കനേഡിയൻ നയതന്ത്ര പ്രതിനിധികളും അവരുടെ കുടുംബവും രാജ്യം വിട്ടിരുന്നു. പിന്നാലെ ഇന്ത്യയിലെ ചില എംബസികളും കോണ്‍സുലേറ്റുകളും കാനഡ അടച്ചുപൂട്ടി. മുംബൈ, ചണ്ഡിഗഢ്, ബെംഗളൂരു നഗരങ്ങളിലെ കോണ്‍സുലേറ്റുകളാണ് അന്ന് അടച്ചു പൂട്ടിയത്. വിയന്ന കണ്‍വെന്‍ഷന്റെ ആര്‍ട്ടിക്കിള്‍ 11.1 അനുസരിച്ചാണ് നയതന്ത്ര ഉദ്യോഗസ്ഥരെ പിന്‍വലിക്കാന്‍ കാനഡയോടെ ആവശ്യപ്പെട്ടതെന്നും കനേഡിയന്‍ നയതന്ത്ര ഉദ്യോഗസ്ഥര്‍ ഇന്ത്യയുടെ ആഭ്യന്തര വിഷയങ്ങളില്‍ ഇടപെട്ടതായും ഇന്ത്യൻ വിദേശ കാര്യമന്ത്രാലയം വ്യക്തമാക്കി. ഇന്ത്യ കടുത്ത നടപടികളിലേക്ക് കടന്നതോടെ സ്വന്തം രാജ്യത്ത് നിന്ന് ഉൾപ്പെടെ വലിയ വിമർശനമാണ് ട്രൂഡോയ്ക്ക് ഏറ്റുവാങ്ങേണ്ടി വന്നത്.

അടിസ്ഥാനരഹിതമായ ആരോപണമാണ് കാനഡയുടെ ഭാഗത്ത് നിന്നുള്ളതെന്നും ആരോപിക്കുന്ന കാര്യങ്ങൾക്ക് തെളിവ് ഹാജരാക്കണമെന്ന് ഇന്ത്യ ആവശ്യപ്പെട്ടിരുന്നു. സംഭവത്തിൽ അന്വേഷണം നടക്കുന്നുവെങ്കിൽ അതുമായി സഹകരിക്കാൻ ബുദ്ധിമുട്ടില്ലെന്നും എന്നാൽ തെളിവില്ലാത്ത ആരോപണങ്ങൾ അംഗീകരിക്കാൻ കഴിയില്ലെന്നും വിദേശകാര്യ മന്ത്രാലയം വ്യക്തമാക്കിയിരുന്നു.

ഈ വർഷം ജൂണിലാണ് ഒരു ഗുരുദ്വാരയ്ക്ക് മുന്നിൽ വെച്ച് 45കാരനായ ഹർദീപ് സിംഗ് നിജ്ജാർ കൊല്ലപ്പെട്ടത്. കാറിൽ വിശ്രമിക്കുകയായിരുന്ന നിജ്ജാറിനെ ബൈക്കിലെത്തിയ രണ്ടംഗ സംഘം വെടിവെച്ച് കൊലപ്പെടുത്തുകയായിരുന്നു. ഇന്ത്യയിൽ നിന്ന് കുടുംബസമേതം കാനഡയിലേക്ക് കുടിയേറിയ വ്യക്തിയാണ് നിജ്ജാർ. 2020ൽ കേന്ദ്രസർക്കാർ ഇയാളെ ഭീകരനായി പ്രഖ്യാപിച്ചിരുന്നു