ഇന്ന് അന്താരാഷ്ട്ര ദാരിദ്ര്യ നിർമാർജന ദിനം ; പട്ടിണി കാരണം ദുരിതമനുഭവിക്കുന്ന ജനങ്ങളുടെ പ്രശ്‌നങ്ങൾ പരിഹരിക്കുക എന്നതാണ് ഈ ദിനാചരണത്തിന്റെ മഹത്തായ ലക്ഷ്യം

ഇന്ന് അന്താരാഷ്ട്ര ദാരിദ്ര്യ നിർമാർജന ദിനം. എല്ലാ വർഷവും ഒക്ടോബർ 17 നാണ് ലോകമെമ്പാടും ഈ ദിനം ആചരിക്കുന്നത്. ദാരിദ്ര്യം അക്രമം, പട്ടിണി എന്നിവകൊണ്ട് ദുരിതമനുഭവിക്കുന്ന ജനങ്ങളുടെ പ്രശ്‌നങ്ങൾ പരിഹരിക്കുക എന്ന മഹത്തായ ലക്ഷ്യമാണ് ഈ ആചരണത്തിന് പിന്നിലുള്ളത്. ദാരിദ്ര്യം കുറയ്ക്കാനും ഇല്ലാതാക്കാനും, ദാരിദ്ര്യത്തിൽ കഴിയുന്ന ആളുകളുടെ പരിശ്രമവും പോരാട്ടവും അംഗീകരിക്കാനും അവരെ കേൾക്കാനുള്ള അവസരം നൽകാനും ഈ ദിനം ലക്ഷ്യമിടുന്നു.

ദാരിദ്ര്യം മനുഷ്യാവകാശങ്ങളുടെ ലംഘനമാണ്, ഈ അവകാശങ്ങൾ മാനിക്കപ്പെടുന്നുവെന്ന് ഉറപ്പുവരുത്താൻ ലോകമെമ്പാടുമുള്ള ആളുകൾ ഒത്തുചേരേണ്ടതുണ്ട്. ദാരിദ്ര്യരഹിത ലോകം കൈവരിക്കാതെ, മനുഷ്യരാശിയുടെ വികസനം സങ്കൽപ്പിക്കാൻ പ്രയാസമാണ്. 1992 ഡിസംബർ 22നാണ് ഐക്യരാഷ്ട്ര സംഘടനയുടെ പൊതുസഭയാണ് ഈ ദിനാചരണം ഏർപ്പെടുത്തിയത്.

ഈ വർഷത്തെ പ്രമേയം ‘പ്രായോഗികമായി എല്ലാവർക്കും അന്തസ്സ്’ എന്നതാണ്. ലോകമെമ്പാടുമുള്ള എല്ലാ വ്യക്തികളോടും സാമൂഹിക നീതിക്കും സമാധാനത്തിനും വേണ്ടി പരിശ്രമിക്കാൻ ഐക്യരാഷ്ട്രസഭ ആവശ്യപ്പെടുന്നു. ഒരു മനുഷ്യന്റെ അന്തസ്സ് എന്നത് മൗലികാവകാശം മാത്രമല്ല, മറ്റെല്ലാ അവകാശങ്ങളുടെയും അടിസ്ഥാനമാണ്. എന്നാൽ ഇന്ന്, പല വ്യക്തികളും നിരന്തരമായ ദാരിദ്ര്യത്തിലാണ് ജീവിക്കുന്നത്. ഇതുമൂലം അവരുടെ അന്തസ്സ് നിഷേധിക്കപ്പെടുകയോ അനാദരിക്കപ്പെടുകയോ ചെയ്യുന്നു.