ഇറാൻ്റെ മിസൈൽ ആക്രമണവും പശ്ചിമേഷ്യയിലെ സംഘർഷാവസ്ഥയും! യുഎഇ മന്ത്രി റീം അൽ ഹാഷിമി ദില്ലിയിൽ; വിദേശകാര്യമന്ത്രി എസ്. ജയശങ്കറുമായി ചർച്ച നടത്തി

പശ്ചിമേഷ്യയിലെ സുരക്ഷാ വെല്ലുവിളികളും ഉഭയകക്ഷി സഹകരണവും ചർച്ച ചെയ്യുന്നതിനായി യുഎഇ അന്താരാഷ്ട്ര സഹകരണ സഹമന്ത്രി റീം ബിൻത് ഇബ്രാഹിം അൽ ഹാഷിമി ദില്ലിയിലെത്തി. ഇന്ത്യൻ വിദേശകാര്യ മന്ത്രി ഡോ. എസ്. ജയശങ്കർ, വിദേശകാര്യ സെക്രട്ടറി വിക്രം മിസ്രി എന്നിവരുമായി നടത്തിയ കൂടിക്കാഴ്ചയിൽ ഇറാൻ്റെ മിസൈൽ ആക്രമണങ്ങൾ മേഖലയിലെ സ്ഥിരതയെയും ആഗോള സാമ്പത്തിക സുരക്ഷയെയും എപ്രകാരം ബാധിക്കുന്നു എന്നതാണ് പ്രധാന ചർച്ചാ വിഷയമായത്. അന്താരാഷ്ട്ര ഊർജ്ജ വിതരണത്തിൻ്റെയും വ്യാപാരത്തിൻ്റെയും നിർണ്ണായക പാതയായ ഹോർമുസ് കടലിടുക്കിലെ കപ്പൽ ഗതാഗതത്തിൻ്റെ സുരക്ഷ ഉറപ്പാക്കേണ്ടതിൻ്റെ ആവശ്യകത ഇരുരാജ്യങ്ങളും അടിവരയിട്ടു.

യുഎഇക്കും മേഖലയിലെ മറ്റ് രാജ്യങ്ങൾക്കും നേരെ ഇറാൻ നടത്തുന്ന പ്രകോപനപരമായ ആക്രമണങ്ങൾ അന്താരാഷ്ട്ര നിയമങ്ങളുടെയും ഐക്യരാഷ്ട്രസഭയുടെ ചാർട്ടറിൻ്റെയും ലംഘനമാണെന്ന് റീം അൽ ഹാഷിമി വ്യക്തമാക്കി. ഇത്തരം നടപടികൾ രാജ്യങ്ങളുടെ പരമാധികാരത്തിന് ഭീഷണിയാണെന്നും ആഗോള വ്യാപാര പാതകളെ തടസ്സപ്പെടുത്തുന്നുവെന്നും അവർ ചൂണ്ടിക്കാട്ടി. തങ്ങളുടെ പരമാധികാരവും ദേശീയ താൽപ്പര്യങ്ങളും സംരക്ഷിക്കാൻ യുഎഇക്ക് പൂർണ്ണ അവകാശമുണ്ടെന്നും അതിൽ വിട്ടുവീഴ്ചയുണ്ടാകില്ലെന്നും മന്ത്രി ഉറപ്പിച്ചു പറഞ്ഞു. സമാധാനം നിലനിർത്തുന്നതിനും സംഘർഷങ്ങൾ ലഘൂകരിക്കുന്നതിനും ഐക്യരാഷ്ട്രസഭയുമായും മറ്റ് അന്താരാഷ്ട്ര പങ്കാളികളുമായും ചേർന്ന് പ്രവർത്തിക്കാനുള്ള യുഎഇയുടെ പ്രതിബദ്ധത അവർ ആവർത്തിച്ചു.

ഇറാൻ്റെ ആക്രമണങ്ങളെ അപലപിച്ചുകൊണ്ടുള്ള ഐക്യരാഷ്ട്രസഭയുടെയും അന്താരാഷ്ട്ര മാരിടൈം ഓർഗനൈസേഷൻ്റെയും (IMO) പ്രമേയങ്ങളെക്കുറിച്ചും ചർച്ചയിൽ പരാമർശമുണ്ടായി. ആക്രമണങ്ങൾ ഉടനടി അവസാനിപ്പിക്കണമെന്നും നാശനഷ്ടങ്ങൾക്ക് ഇറാൻ പൂർണ്ണ ഉത്തരവാദിയായിരിക്കുമെന്നും യുഎൻ പ്രമേയം വ്യക്തമാക്കുന്നുണ്ട്. ചരിത്രത്തിലാദ്യമായി 115-ലധികം അംഗരാജ്യങ്ങൾ പിന്തുണച്ച ഐഎംഒ പ്രമേയം ഇറാൻ്റെ ഭീഷണികൾക്കെതിരെയുള്ള അന്താരാഷ്ട്ര സമൂഹത്തിൻ്റെ ശക്തമായ മുന്നറിയിപ്പാണെന്നും റീം അൽ ഹാഷിമി കൂട്ടിച്ചേർത്തു. ഇന്ത്യയുമായുള്ള തന്ത്രപ്രധാനമായ ബന്ധം കൂടുതൽ ശക്തിപ്പെടുത്തുന്നതിനൊപ്പം മേഖലയിലെ സുരക്ഷാ ക്രമീകരണങ്ങളിൽ പരസ്പര സഹകരണം ഉറപ്പാക്കാനും ഈ സന്ദർശനം ലക്ഷ്യമിടുന്നു.