കളമശ്ശേരി സ്‌ഫോടന പരമ്പര !സ്‌ഫോടനത്തിന്റെ ഉത്തരവാദിത്വം ഏറ്റെടുത്ത് കൊച്ചി സ്വദേശി കൊടകര പോലീസ് സ്‌റ്റേഷനിൽ കീഴടങ്ങി; ചോദ്യം ചെയ്യൽ തുടരുന്നു

തൃശ്ശൂർ: കളമശേരിയിൽ കൺവൻഷൻ സെന്ററിൽ വച്ച് നടന്ന യഹോവ സാക്ഷ്യ സമ്മേളനത്തിനിടെയുണ്ടായ ബോംബ് സ്‌ഫോടനത്തിന്റെ ഉത്തരവാദിത്വം ഏറ്റെടുത്ത് കൊച്ചി സ്വദേശി തൃശ്ശൂരിലെ കൊടകര പോലീസ് സ്‌റ്റേഷനില്‍ കീഴടങ്ങി. താനാണ് ബോംബ് വെച്ചത് എന്ന് പറഞ്ഞാണ് ഇയാൾ സ്റ്റേഷനിലെത്തി കീഴടങ്ങിയതെന്നാണ് വിവരം . ഉച്ചയ്ക്ക് ഒന്നരയോടെ സ്‌റ്റേഷനിലെത്തിയ ഇയാളെ രഹസ്യമായി ചോദ്യം ചെയ്ത് വരികയാണ്.

ഇയാളുടെ വാദം സ്ഥിരീകരിക്കാൻ സാധിക്കാത്തതിനാൽ ഇയാളെ പറ്റി കൂടുതല്‍ വിശദാംശങ്ങള്‍ പോലീസ് പുറത്തു വിട്ടിട്ടില്ല. അതിനിടെ കണ്ണൂർ റെയിൽവേ സ്റ്റേഷനിൽ നിന്ന് അന്യസംസ്ഥാന സ്വദേശിയായ ഒരാളെ പോലീസ് കസ്റ്റഡിയിലെടുത്തുവന്നും സ്ഥിരീകരിക്കാത്ത വിവരവും പുറത്തു വരുന്നുണ്ട്

സ്‌ഫോടന സ്ഥലത്ത് നിന്ന് ഒരു നീല ബലേനോ കാര്‍ പുറത്തു പോകുന്നതിന്റെ ദൃശ്യങ്ങള്‍ പോലീസിന് ലഭിച്ചിട്ടുണ്ട്. ഇത് കേന്ദ്രീകരിച്ചും പോലീസ് അന്വേഷണം നടത്തുന്നുണ്ട്. ബോംബ് സ്ഥാപിച്ചയാള്‍ രക്ഷപ്പെടാന്‍ ശ്രമിച്ച കാറാണോ ഇത് എന്ന് കണ്ടുപിടിക്കാനുള്ള ശ്രമത്തിലാണ് പോലീസ്.

ഇന്ന് രാവിലെ പത്ത് മണിയോടെ കളമശ്ശേരി മെഡിക്കല്‍ കോളജിന് സമീപമുള്ള സാമ്ര ഇന്റര്‍നാഷണല്‍ കണ്‍വെന്‍ഷന്‍ സെന്ററിലുണ്ടായ സ്‌ഫോടനത്തില്‍ ഒരാള്‍ കൊല്ലപ്പെടുകയും അൻപതിനോടടുത്ത് ആളുകൾക്ക് പരിക്കേല്‍ക്കുകയും ചെയ്തിരുന്നു. ഇതില്‍ അഞ്ചുപേരുടെ നില ഗുരുതരമാണെന്നാണ് വിവരം.