കളമശ്ശേരി കൂട്ടബലാത്സംഗം. ക്രൂര പീഡനത്തില്‍ ശരണ്യയും ഉള്‍പ്പെട്ടിട്ടുണ്ടെന്ന് അതിജീവിതയുടെ നിര്‍ണായക മൊഴി. നാല് പ്രതികളെയും തിരിച്ചറിഞ്ഞു, തെളിവെടുപ്പ് ഇന്ന്

കളമശ്ശേരി കൂട്ടബലാത്സംഗ കേസില്‍ അതിജീവിതയുടെ വിശദമായ മൊഴി പൊലീസ് രേഖപ്പെടുത്തി. അറസ്റ്റിലായ ശരണ്യയടക്കം ക്രൂരമായ ലൈംഗിക പീഡനത്തിന് ഇരയാക്കിയെന്ന് യുവതി മൊഴി നല്‍കി. തൃക്കാക്കര എസിപിയുടെ നേതൃത്വത്തില്‍ കളമശ്ശേരി മെഡിക്കല്‍ കോളേജ് ആശുപത്രിയില്‍ വെച്ചാണ് മൊഴിയെടുത്തത്. കേസില്‍ അറസ്റ്റിലായ നാല് പ്രതികളെയും യുവതി തിരിച്ചറിഞ്ഞിട്ടുണ്ട്.

പിടിയിലായ ശ്രീരാജ്, ജിത്ത് മാര്‍ട്ടിന്‍ എന്നീ പ്രതികളുമായി പൊലീസ് ഇന്ന് തെളിവെടുപ്പ് നടത്തും. തന്നെ ഏറ്റവും കൂടുതല്‍ ഉപദ്രവിച്ചത് ‘അമ്മു’ എന്ന് അറിയപ്പെടുന്ന ശരണ്യയാണെന്ന് അതിജീവിത മൊഴി നല്‍കി. ആറുമാസം മുമ്പാണ് ശരണ്യ സ്പാ ജോലിയില്‍ പ്രവേശിച്ചത്. ശരണ്യയ്ക്കും സഞ്ജുവിനും മുഖ്യപ്രതി ശ്രീരാജുമായുള്ള ബന്ധത്തെക്കുറിച്ച് പൊലീസ് വിശദമായി പരിശോധിക്കും. കര്‍ണാടകയിലേക്ക് കടക്കാന്‍ ശ്രമിക്കുന്നതിനിടയിലാണ് സഞ്ജുവും ശരണ്യയും പൊലീസിന്റെ പിടിയിലായത്.

കൂട്ടബലാത്സംഗത്തിന്റെ കാവല്‍ക്കാരനായിരുന്നു സഞ്ജു. ഇരുവരും മുഖ്യപ്രതി ശ്രീരാജിന്റെ സുഹൃത്തുക്കളാണ്. കേസില്‍ കൂടുതല്‍ പ്രതികള്‍ ഉണ്ടെന്നാണ് അതിജീവിതയുടെ ഭര്‍ത്താവിന്റെ ആരോപണം. പ്രതികളുടെ ഗുണ്ടാ – റാക്കറ്റ് ബന്ധങ്ങളെക്കുറിച്ചും പൊലീസ് സമഗ്രമായ അന്വേഷണം ആരംഭിച്ചിട്ടുണ്ട്.