വേദമന്ത്ര മുഖരിതമായ അന്തരീക്ഷത്തിൽ കേദാർനാഥ് ക്ഷേത്ര നട തുറന്നു; വൻ ഭക്തജനത്തിരക്ക്; ബദരീനാഥ് തുറക്കുന്നതോടെ ചതുർധാം യാത്ര ആരംഭിക്കും

ഡെറാഡൂൺ: രാജ്യത്തെ പന്ത്രണ്ട് ജ്യോതിർലിംഗങ്ങളിലൊന്നായ കേദാർനാഥ് ക്ഷേത്രം തീർഥാടകർക്കായി തുറന്നു. ഇന്ന് രാവിലെ വേദമന്ത്ര മുഖരിതമായ അന്തരീക്ഷത്തിലാണ് കേദാർനാഥ് ക്ഷേത്ര നട തുറന്നത്. തുടർന്ന് ഞായറാഴ്ച ബദരീനാഥ് ക്ഷേത്ര നട തുറക്കുമെന്ന് ക്ഷേത്ര പുരോഹിതനായ റാവൽജീ ഈശ്വരപ്രസാദ് നമ്പൂതിരി അറിയിച്ചു. കഴിഞ്ഞ ദിവസം ഗംഗോത്രിയും യമുനോത്രിയും തുറന്നിരുന്നു.

അതേസമയം കൊടുംതണുപ്പിലും വൻ ഭക്തജനത്തിരക്കാണ് ഇവിടെ അനുഭവപ്പെട്ടത്. ശൈത്യകാലത്ത് അടച്ചിട്ട ശേഷം ആദ്യമായാണ് ക്ഷേത്രം ഭക്തർക്കായി തുറന്നത്. മാത്രമല്ല ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമിയും ചടങ്ങിൽ പങ്കെടുത്തു. ചതുർധാം യാത്രയുടെ രണ്ടാം ഘട്ടമായാണ് ഹിമാലയൻ ക്ഷേത്ര നഗരങ്ങൾ തുറന്നത്.

നേരത്തെ, ഗംഗോത്രിയും യമുനോത്രിയും അക്ഷയ തൃതീയ ദിനത്തിൽ തുറന്നിരുന്നു. മാത്രമല്ല അക്ഷയ തൃതീയ ദിനത്തിലാണ് ചതുർത്ഥാം കേന്ദ്രങ്ങളുടെ ആദ്യ ഘട്ടം ആരംഭിക്കുന്നത്. ഇതോടെ ‘ചാർ ധാം യാത്ര 2022’ ന് തുടക്കമായിരുന്നു. മെയ് എട്ടിന് ബദരീനാഥ് തുറക്കും. ഇതോടെ പൂർണ്ണമായും ചതുർധാം യാത്ര ആരംഭിക്കും.

കോവിഡ് കേസുകൾ വർധിക്കുന്നതിനാൽ തീർത്ഥാടകരുടെ എണ്ണം നിജപ്പെടുത്തിയിട്ടുണ്ട്. കേദാർനാഥ് ക്ഷേത്രത്തിലെ പ്രതിദിന തീർഥാടക പരിധി 12,000 ആയും ബദരീനാഥിൽ ഇത് 15,000 ആയും നിലനിർത്തിയിട്ടുണ്ട്. ഇതിനിടെ ചാർത്ഥാം യാത്രയിൽ കൊറോണ വാക്‌സിനേഷൻ സർട്ടിഫിക്കറ്റ് നിർബന്ധമാക്കിയിട്ടില്ലെന്ന പ്രത്യേകതയുമുണ്ട്.