കേരളാ ടീമിന്റെ മടക്കയാത്ര ചാർട്ടർ ചെയ്ത സ്വകാര്യ വിമാനത്തിൽ !! വൻ വരവേൽപ്പ് നൽകാൻ കാത്ത് കെസിഎയും ആരാധകരും

തിരുവനന്തപുരം : രഞ്ജി ട്രോഫി ഫൈനലിൽ പൊരുതി തോറ്റ കേരള ടീമിന് വൻ വരവേൽപ്പ് നൽകാൻ കേരള ക്രിക്കറ്റ് അസോസിയേഷൻ. കെസിഎ ചാർട്ടർ ചെയ്ത സ്വകാര്യ വിമാനത്തിലാകും ടീം നാട്ടിൽ മടങ്ങിയെത്തുക. അസോസിയേഷൻ പ്രസിഡന്റ് ജയേഷ് ജോർജ്, സെക്രട്ടറി വിനോദ് എസ്.കുമാർ എന്നിവരുടെ നേതൃത്വത്തിലാണ് കേരള ടീമിനെ നാട്ടിലേക്ക് കൊണ്ടുവരിക. ഇരുവരും ഇതിനോടകം നാഗ്പുരിലെത്തി.

നാളെ രാത്രി രാത്രി 9.30ന് കേരള ടീം തിരുവനന്തപുരം വിമാനത്താവളത്തിൽ എത്തും. അവിടെ കെസിഎ ഭാരവാഹികളും അംഗങ്ങളും ചേർന്ന് ടീമംഗങ്ങളെ സ്വീകരിക്കും. തുടർന്ന് ട്രോഫിയുമായി കെസിഎ ആസ്ഥാനത്ത് എത്തുന്ന ടീമിനെ പ്രത്യേകമായി ആദരിക്കും. ഹോട്ടൽ ഹയാത്തിലാണ് കേരള ടീമിന് താമസം ഒരുക്കിയിരിക്കുന്നത്. മറ്റന്നാൾ വൈകുന്നേരം 6ന് ഹയാത്തിൽ നടക്കുന്ന അനുമോദന ചടങ്ങിൽ മുഖ്യമന്ത്രി പിണറായി വിജയൻ വിശിഷ്ടാതിഥിയായി പങ്കെടുക്കും. ചടങ്ങിൽ പ്രതിപക്ഷ നേതാവ് വി.ഡി. സതീശൻ, കായികമന്ത്രി അബ്ദുറഹിമാൻ, മന്ത്രിമാരായ കെ.രാജൻ, പി.പ്രസാദ്, പി.രാജീവ്, എംഎൽഎമാർ, പൗരപ്രമുഖർ തുടങ്ങിയവരും പങ്കെടുക്കും.