ഓയൂരിലെ തട്ടിക്കൊണ്ടുപോകൽ ; കുട്ടിയുടെ വീട്ടിലേക്ക് മോചനദ്രവ്യം ആവശ്യപ്പെട്ട് വിളിച്ചത് പത്മകുമാറിന്റെ ഭാര്യ ; ഗ്രാമപഞ്ചായത്ത് പ്രതിനിധികൾ ശബ്ദം തിരിച്ചറിഞ്ഞു

ഓയൂരിൽ ആറുവയസുകാരിയെ തട്ടിക്കൊണ്ടുപോയ കേസിൽ കുട്ടിയുടെ വീട്ടിലേക്ക് മോചനദ്രവ്യം ആവശ്യപ്പെട്ട് വിളിച്ചത് പത്മകുമാറിന്റെ ഭാര്യ അനിതകുമാരി. ഇവരുടെ ശബ്ദം ​ഗ്രാമപഞ്ചായത്ത് പ്രതിനിധികൾ തിരിച്ചറിഞ്ഞിട്ടുണ്ട്. കുട്ടിയെ തട്ടിക്കൊണ്ടു പോയ ശേഷം മാതാവിന്റെ ഫോണിലേക്ക് 10 ലക്ഷം രൂപ ആവശ്യപ്പെട്ടായിരുന്നു അനിതകുമാരി ഫോൺ ചെയ്തത്.

രണ്ടു തവണയാണ് ഇവർ കുട്ടിയുടെ വീട്ടിലേക്ക് വിളിച്ചത്. ആദ്യം അഞ്ചു ലക്ഷം രൂപയും രണ്ടാമത് പത്തു ലക്ഷം രൂപയുമാണ് മോചനദ്രവ്യം ആവശ്യപ്പെട്ടത്. അതേസമയം, പത്മകുമാർ, ഭാര്യ അനിതകുമാരി, മകൾ അനുപമയും ഇപ്പോൾ പൊലീസ് കസ്റ്റഡിയിലാണ്.

അതേസമയം, പിടിയിലായ പത്മകുമാറിനെയും കുടുംബത്തെയും പുലർച്ചെവരെ പോലീസ് ചോദ്യം ചെയ്തു. എഡിജിപി, ഡിഐജി എന്നിവർ ചോദ്യം ചെയ്യലിനെത്തിയിരുന്നു. ചോദ്യം ചെയ്യൽ പുലർച്ചെ മൂന്ന് മണി വരെ നീണ്ടു. പ്രതി പത്മകുമാർ മൊഴികൾ മാറ്റിമാറ്റി പറയുന്നത് പോലീസിനെ കുഴയ്ക്കുന്നുണ്ട്. പ്രതികളുടെ മൊഴിയിൽ അന്വേഷണ സംഘം ഇന്ന് വ്യക്തത വരുത്തും. സാമ്പത്തിക ബാധ്യത തീർക്കാനുള്ള ബ്ലാക് മെയിലിംഗ്, പെൺകുട്ടിയുടെ അച്ഛനുമായുള്ള ബന്ധം എന്നിവയിൽ വ്യക്തത വരുത്തും. പത്മകുമാറിന്റെ സാമ്പത്തിക ഇടപാടുകൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്. കൂടാതെ പത്മകുമാറിന്റെ ഭാര്യക്കും മകൾക്കും തട്ടിക്കൊണ്ടുപോകലിൽ പങ്കുണ്ടോ എന്നതിലും ഇന്ന് സ്ഥിരീകരണമുണ്ടാകും.