കോട്ടയത്ത് അരും കൊല; ഭാര്യയെ വെട്ടിക്കൊന്ന് ഭർത്താവ് ആത്മഹത്യ ചെയ്തു

കോട്ടയം: കോട്ടയത്ത് വീണ്ടും അരും കൊല. ഭാര്യയെ വെട്ടിക്കൊന്ന ഭർത്താവ് ആത്മഹത്യ ചെയ്തു. അയർകുന്നം സ്വദേശികളായ പതിക്കൽ സുധീഷ്, ഭാര്യ ടിന്റു എന്നിവരാണ് മരിച്ചത്. സുധീഷിനെ കൈത്തണ്ട മുറിച്ച് തൂങ്ങിമരിച്ച നിലയിലും ഭാര്യ ടിന്റുവിന്റെ മൃതദേഹം കട്ടിലിന് അടിയിലുമായിരുന്നു ഉണ്ടായിരുന്നത്.

കുടുംബവഴക്കാണ് കൊലപാതകത്തിലും തുടർന്ന് ആത്മഹത്യയിലും കലാശിച്ചെന്നാണ് പ്രാഥമിക നിഗമനം. എന്നാൽ ദമ്പതികൾക്കിടയിൽ പ്രശ്‌നങ്ങൾ ഉണ്ടായിരുന്നില്ലെന്നാണ് ബന്ധുക്കളുടെ മൊഴി. നാട്ടുകാരാണ് വിവരം പോലീസിനെ അറിയിച്ചത്.

വിദേശത്ത് ജോലി ചെയ്യുന്നയാളായിരുന്നു സുധീഷ്. രണ്ട് മാസം മുമ്പായിരുന്നു ഇയാൾ നാട്ടിലെത്തിയത്. ടിന്റു നഴ്‌സാണ്. ഭാര്യയെ വിദേശത്ത് കൊണ്ടുപോകാനുള്ള ശ്രമങ്ങൾ നടന്നിരുന്നുവെന്നും ബന്ധുക്കൾ പറയുന്നു. സംഭവത്തിൽ അന്വേഷണം പുരോഗമിക്കുകയാണ്.