പെരിയാറിലെ മത്സ്യക്കുരുതിക്കിടയാക്കിയത് രാസവസ്തുക്കളുടെ സാന്നിധ്യമെന്ന് കുഫോസിന്റെ അന്തിമ റിപ്പോർട്ട് ! ഫിഷറീസ് വകുപ്പ് ഡയറക്ടര്‍ക്ക് കൈമാറിയ റിപ്പോര്‍ട്ട് പുറത്തുവിടണമെന്ന് മത്സ്യത്തൊഴിലാളി പരിസ്ഥിതി സംഘടനകൾ

എറണാകുളം : പെരിയാറിലെ മത്സ്യക്കുരുതിയിൽ കുഫോസിലെ വിദഗ്‌ധ സമിതി തയ്യാറാക്കിയ അന്തിമ റിപ്പോര്‍ട്ട് സര്‍ക്കാരിന് സമര്‍പ്പിച്ചു. മീനുകളില്‍ നടത്തിയ പരിശോധനയിലും രാസസാന്നിധ്യം കണ്ടെത്തി. പെരിയാറിലെ ജലത്തിൽ ക്രമാതീതമായ അളവില്‍ രാസമാലിന്യം കലര്‍ന്നിട്ടുണ്ടെന്ന കുഫോസിന്റെ പ്രാഥമിക കണ്ടെത്തലുകളുടെ തുടർച്ചയാണ് അന്തിമറിപ്പോർട്ട്. പെരിയാറില്‍ അമിതമായി കലര്‍ന്ന അമോണിയ, ഹൈഡ്രജന്‍ സള്‍ഫൈഡ് എന്നിവയുടെ സാന്നിധ്യമാകാം മത്സ്യക്കുരുതിക്ക് കാരണമെന്നായിരുന്നു കുഫോസിന്റെ പ്രാഥമിക റിപ്പോര്‍ട്ട്.

പാതാളം റെഗുലേറ്റര്‍ ബ്രിഡ്ജ് തുറന്നപ്പോള്‍ ഓക്സിജന്റെ അളവ് കുറഞ്ഞതാണ് മത്സ്യങ്ങള്‍ കൂട്ടത്തോടെ ചത്തുപൊങ്ങിയതിന് കാരണമെന്നായിരുന്നു മലിനീകരണ നിയന്ത്രണ ബോര്‍ഡ് സര്‍ക്കാരിന് നല്‍കിയ റിപ്പോര്‍ട്ട്. കുഫോസിന്റെ പ്രാഥമിക റിപ്പോര്‍ട്ട് അവഗണിച്ച് മലിനീകരണ നിയന്ത്രണ ബോർഡ് വാദത്തെ ന്യായീകരിച്ച് മുഖ്യമന്ത്രി നിയമസഭയില്‍ മറുപടി നല്‍കിയത് വിവാദമായിരുന്നു.

പെരിയാറിലെ മത്സ്യക്കുരുതിയെ തുടര്‍ന്ന് കഴിഞ്ഞ 22-നാണ് കുഫോസിലെ ഗവേഷകര്‍ ഉള്‍പ്പെടുന്ന ഏഴംഗ സമിതിയെ സര്‍ക്കാര്‍ നിയോഗിച്ചത്. ഫിഷറീസ് വകുപ്പ് ഡയറക്ടര്‍ക്ക് കൈമാറിയ റിപ്പോര്‍ട്ട് പുറത്തുവിടണമെന്ന് മത്സ്യത്തൊഴിലാളി സംഘടനകളും പരിസ്ഥിതി സംഘടനകളും ആവശ്യപ്പെടുന്നുണ്ട്.