ലോറൻസ് ബിഷ്‌ണോയിയുടെ സഹോദരൻ അൻമോൽ ബിഷ്‌ണോയ് പിടിയിൽ; അമേരിക്ക നാടുകടത്തിയതിന് പിന്നാലെ അറസ്റ്റ് രേഖപ്പെടുത്തി എൻഐഎ

ദില്ലി : കുപ്രസിദ്ധ ഗുണ്ടാതലവൻ ലോറൻസ് ബിഷ്‌ണോയിയുടെ സഹോദരനും പിടികിട്ടാപ്പുള്ളിയുമായ അൻമോൽ ബിഷ്‌ണോയിയെ ദേശീയ അന്വേഷണ ഏജൻസി അറസ്റ്റ് ചെയ്തു. അമേരിക്കയിൽ നിന്നും നാടുകടത്തപ്പെട്ട് ഇന്ത്യയിലെത്തിച്ചതിന് പിന്നാലെയാണ് എൻഐഎ ഇയാളുടെ അറസ്റ്റ് രേഖപ്പെടുത്തിയത്. ഇയാളെ ഉടൻ തന്നെ ദില്ലിയിലെ പ്രത്യേക കോടതിയിൽ ഹാജരാക്കുമെന്ന് ഉദ്യോഗസ്ഥർ അറിയിച്ചു.

മുംബൈ പോലീസ് സമർപ്പിച്ച നാടുകടത്തൽ അപേക്ഷകൾ പരിഗണിച്ചാണ് അമേരിക്കൻ ഭരണകൂടം നടപടി സ്വീകരിച്ചത്. എൻസിപി നേതാവും മുൻ മന്ത്രിയുമായ ബാബ സിദ്ദീഖിയുടെ കൊലപാതകം, ബോളിവുഡ് താരം സൽമാൻ ഖാന്റെ വസതിക്ക് നേരെയുണ്ടായ വെടിവെപ്പ്, പഞ്ചാബി ഗായകൻ സിദ്ദു മൂസ്‌വാലയുടെ കൊലപാതകം തുടങ്ങി 18-ഓളം ക്രിമിനൽ കേസുകളിലെ പ്രതിയാണ് അൻമോൽ.

ലോറൻസ് ബിഷ്‌ണോയിയുടെ നേതൃത്വത്തിലുള്ള ഭീകര-കുറ്റകൃത്യ സിൻഡിക്കേറ്റുമായി ബന്ധപ്പെട്ട് അറസ്റ്റിലാകുന്ന 19-ാമത്തെ പ്രതിയാണ് അൻമോൽ. 2023 മാർച്ചിൽ എൻഐഎ ഇയാൾക്കെതിരെ കുറ്റപത്രം സമർപ്പിച്ചിരുന്നു. വിദേശത്തിരുന്ന് ലോറൻസ് ബിഷ്‌ണോയി സംഘത്തിന് വേണ്ടി ഭീകരപ്രവർത്തനങ്ങൾ ഏകോപിപ്പിച്ചിരുന്നത് അൻമോൽ ആയിരുന്നു. ഇന്ത്യയിലെ പ്രവർത്തനങ്ങൾക്ക് ആവശ്യമായ പണവും ലൊജിസ്റ്റിക് സഹായവും ഇയാൾ നൽകിയിരുന്നു. ഭീകരനായി പ്രഖ്യാപിക്കപ്പെട്ട ഗോൾഡി ബ്രാറുമായി ചേർന്ന് 2020-2023 കാലഘട്ടത്തിൽ ഇന്ത്യയിൽ നിരവധി അക്രമങ്ങൾക്ക് ഇയാൾ പദ്ധതിയിട്ടിരുന്നു.

പഞ്ചാബിലെ ഫസിൽക്ക സ്വദേശിയായ അൻമോലിന്റെ തലയ്ക്ക് എൻഐഎ 10 ലക്ഷം രൂപ പാരിതോഷികം പ്രഖ്യാപിച്ചിരുന്നു. 2022-ൽ വ്യാജ പാസ്‌പോർട്ട് ഉപയോഗിച്ച് നേപ്പാൾ വഴിയാണ് ഇയാൾ ഇന്ത്യ വിട്ടത്. തുടർന്ന് ദുബായ്, കെനിയ എന്നിവിടങ്ങളിൽ തങ്ങിയ ശേഷം അമേരിക്കയിലേക്ക് കടക്കുകയായിരുന്നു.

2024 ഒക്ടോബർ 12-ന് മുംബൈയിൽ വെച്ചാണ് ബാബ സിദ്ദീഖി വെടിയേറ്റ് മരിച്ചത്. ഈ കേസിലെ മുഖ്യ ആസൂത്രകരിൽ ഒരാളായി മുംബൈ പോലീസ് അൻമോലിനെ പ്രതിചേർത്തിരുന്നു. കേസിൽ ഇതിനകം 26 പേർ പിടിയിലായിട്ടുണ്ട്. പ്രതികൾക്കെതിരെ മഹാരാഷ്ട്ര കൺട്രോൾ ഓഫ് ഓർഗനൈസ്ഡ് ക്രൈം ആക്ട് (MCOCA) പ്രകാരമാണ് കേസെടുത്തിരിക്കുന്നത്.