വരൂ അവരുടെ ഓരോ കൊച്ചു സ്വപ്നങ്ങൾക്കും നമുക്ക് നിറം പകരാം !! ബൗദ്ധിക വെല്ലുവിളികൾ നേരിടുന്ന വിദ്യാർത്ഥികൾക്ക് സൗജന്യമായി വിദ്യാഭ്യാസവും തൊഴിൽ പരിശീലനവും നൽകിയുള്ള ലില്ലി ലയൺസ്‌ സ്പെഷ്യൽ സ്‌കൂളിന്റെയും വൊക്കേഷണൽ ട്രെയിനിംഗ് സെന്ററിന്റെയും ജൈത്രയാത്ര ഏഴാം വർഷത്തിലേക്ക്

ചെങ്ങന്നൂർ : ബൗദ്ധിക വെല്ലുവിളികൾ നേരിടുന്ന വിദ്യാർത്ഥികൾക്ക് ലാഭേച്ഛയില്ലാതെ സൗജന്യമായി വിദ്യാഭ്യാസവും തെറാപ്പിയും സാമ്പത്തിക സാമൂഹിക പുനരധിവാസത്തിനായി സൗജന്യമായി തൊഴിൽ പരിശീലനവും നൽകി സേവനത്തിന്റെ ഏഴാം വർഷത്തിലേക്ക് കടന്ന് ലില്ലി ലയൺസ്‌ സ്പെഷ്യൽ സ്‌കൂളും വൊക്കേഷണൽ ട്രെയിനിംഗ് സെന്ററും.

ഇന്റർനാഷണൽ ലയൺസ്‌ ക്ല്ബ്സ് രൂപീകരിച്ച ലയൺസ്‌ എഡ്യൂക്കേഷണൽ ചാരിറ്റബിൾ ട്രസ്റ്റിന്റെ നേതൃത്വത്തിലാണ് രണ്ട് സ്ഥാപനങ്ങളും നിരവധി വിദ്യാർത്ഥികളുടെയും അവരുടെ മാതാപിതാക്കളുടെയും സ്വപ്നങ്ങൾക്ക് നിറം പകരുന്നത്.

വിദ്യാർത്ഥികൾക്ക് സൗജന്യമായി വിദ്യാഭ്യാസവും തെറാപ്പിയുമാണ് ലില്ലി ലയൺസ്‌ സ്പെഷ്യൽ സ്‌കൂൾ നൽകുന്നത്. സാമ്പത്തിക സാമൂഹിക പുനരധിവാസത്തിനായി വിദ്യാർത്ഥികൾക്ക് സൗജന്യമായി തൊഴിൽ പരിശീലനം നൽകുന്നത് വൊക്കേഷണൽ ട്രെയിനിംഗ് സെന്ററിലാണ്.

2018 ൽ സ്ഥാപിതമായ ലില്ലി ആറ് വർഷം വാടക കെട്ടിടങ്ങളിൽ പ്രവർത്തിക്കുകയായിരുന്നു. ലില്ലി ലയൺസ് സ്പെഷ്യൽ സ്കൂളിനും ലില്ലി ലയൺസ് വൊക്കേഷണൽ ട്രെയിനിംഗ് സെന്ററിനും സ്കൂൾ കെട്ടിടം നിർമിക്കാൻ ചെങ്ങന്നൂർ, പുലിയൂരിൽ കൊട്ടുപ്ലാക്കൽ കുടുംബാംഗങ്ങളും ദമ്പതികളുമായ കുര്യൻ ഏബ്രഹാമും മറിയാമ്മ കുര്യനും 60 സെന്റ് ഭൂമി ദാനമായി നൽകി.

തുടർന്ന് അഭ്യുദയകാംക്ഷികളുടെ സഹായത്തോടെയും, വിവിധ സ്ഥാപനങ്ങളുടെ സിഎസ്ആർ പദ്ധതികളിലൂടെയും 14,000 സ്ക്വയർ ഫീറ്റ് ഉള്ള സ്കൂൾ സമുച്ചയം ഈ ഭൂമിയിൽ ലയൺസ്‌ എഡ്യൂക്കേഷണൽ ചാരിറ്റബിൾ ട്രസ്റ്റ് നിർമ്മിച്ചു. വിദ്യാർത്ഥികൾക്കായി അന്താരാഷ്‌ട്ര നിലവാരത്തിൽ ആധുനിക ഉപകരണങ്ങളോടുകൂടി സജ്ജീകരിച്ച ഓട്ടിസം ലാബ്, സെൻസറി ഇന്റഗ്രേഷൻ റൂം, ഫിസിയോതെറാപ്പി റൂം, കമ്പ്യൂട്ടർ ലാബ് എന്നിവയും ഇവിടെയുണ്ട്.

ബൗദ്ധിക വെല്ലുവിളികൾ നേരിടുന്ന വിദ്യാർത്ഥികൾക്കായി കേരള സർക്കാരിന്റെ സ്പെഷ്യൽ സ്‌കൂൾ സിലബസിനൊപ്പം, വ്യക്തിഗത പാഠ്യപദ്ധതിയും, സ്‌പീച്ച് തെറാപ്പി, ഫിസിയോതെറാപ്പി, ഒക്കുപ്പേഷണൽ, ബിഹേവിയറൽ തെറാപ്പികൾ, കായിക പരിശീലനം, ബാൻഡ് പ്രാക്ടീസ്, പാട്ട് , നൃത്തം, യോഗ എന്നിവ ഇവിടെ നൽകിവരുന്നു.

പതിനെട്ട് വയസ്സ് കഴിഞ്ഞ വിദ്യാർത്ഥികൾക്ക് വൊക്കേഷണൽ ട്രെയിനിംഗ് സെന്ററിൽ സൗജന്യ തൊഴിൽ പരിശീലനം നൽകുന്നു. ശുചീകരണ ഉത്പന്നങ്ങൾ, ജെൽ കൊണ്ടുള്ള മെഴുകുതിരികൾ, പേപ്പർ ബാഗുകൾ എന്നിവ വിദ്യാർത്ഥികൾ ഇവിടെ നിർമ്മിക്കുന്നു. ഇതോടൊപ്പം ഇവർക്ക് കമ്പ്യൂട്ടർ പരിശീലനവും നൽകുന്നു.

കേരള സർക്കാരിന്റെ രജിസ്ട്രേഷനുള്ള ലില്ലി ലയൺസിൽ സ്പെഷ്യൽ എഡ്യൂക്കേറ്റർമാർ, വൊക്കേഷണൽ ഇൻസ്ട്രക്റ്റർ, തെറാപ്പിസ്റ്റുകൾ, ആയമാർ, ഡ്രൈവർമാർ ഉൾപ്പെടെ 25 ജീവനക്കാരും 140 വിദ്യാർത്ഥികളും ഉണ്ട്.കൂടുതൽ വിവരങ്ങൾക്ക് 9497405700 എന്ന നമ്പറിൽ ബന്ധപ്പെടാനാവുന്നതാണ്.