ഒരു മതവിഭാഗത്തിന്റെയും അനിവാര്യമായ ആചാരമല്ല ലൗഡ്‌സ്പീക്കറുകളുടെ ഉപയോഗമെന്ന് ഹൈക്കോടതി; 2000-ലെ ശബ്ദമലിനീകരണ നിയമങ്ങൾ കർശനമായി നടപ്പിലാക്കാൻ പൊലീസിന് നിർദ്ദേശം; ചട്ടം ലംഘിച്ചാൽ ഉപകരണങ്ങൾ പിടിച്ചെടുക്കാൻ ഉത്തരവ്

മുംബൈ: മതം ആചരിക്കാനും പ്രചരിപ്പിക്കാനുമുള്ള സ്വാതന്ത്ര്യം ഭരണഘടന ഉറപ്പുനൽകുന്നുണ്ടെങ്കിലും, മറ്റുള്ളവരുടെ അവകാശങ്ങളെ ബാധിക്കുന്ന ആചാരങ്ങൾക്ക് ഈ അവകാശം ബാധകമല്ലെന്ന് മുംബൈ ഹൈക്കോടതി. ഒരു മതവിഭാഗത്തിന്റെയും അനിവാര്യമായ ആചാരമല്ല ലൗഡ്‌സ്പീക്കറുകളുടെ ഉപയോഗമെന്ന് നിരീക്ഷിച്ച കോടതി മുംബൈ പോലീസിനോട് 2000-ലെ ശബ്ദമലിനീകരണ നിയമങ്ങൾ കർശനമായി നടപ്പിലാക്കാൻ നിർദ്ദേശിച്ചു. ലൗഡ് സ്പീക്കറുകൾ നിരോധിക്കണമെന്ന ഹർജി പരിഗണിച്ചാണ് നിർദ്ദേശം. ജസ്റ്റിസുമാരായ അജയ് ഗഡ്കരി, ശ്യാം ചന്ദക് എന്നിവരടങ്ങിയ ബെഞ്ചാണ് നിർദ്ദേശം നൽകിയത്.

മുംബൈയിലെ കുർള, ചുനഭട്ടി പ്രദേശങ്ങളിലെ രണ്ട് റസിഡന്റ് വെൽഫെയർ അസോസിയേഷനുകളാണ് ഹർജികൾ സമർപ്പിച്ചത്. ബാങ്ക് വിളി, മതപ്രഭാഷണങ്ങൾ തുടങ്ങിയ മതപരമായ പ്രവർത്തനങ്ങൾക്ക് ലൗഡ്‌സ്പീക്കറുകൾ ഉപയോഗിക്കുന്നത് ശബ്ദമലിനീകരണത്തിന് കാരണമാകുകയും അവരുടെ പ്രദേശങ്ങളിലെ സമാധാനം തകർക്കുകയും ചെയ്യുന്നുവെന്ന് കാട്ടിയാണ് ഹർജിക്കാർ കോടതിയിൽ കേസ് ഫയൽ ചെയ്തത്. പള്ളികളിലും മറ്റ് മതപരമായ പരിപാടികളിലും ഉപയോഗിക്കുന്ന ലൗഡ്‌സ്പീക്കറുകളിൽ നിന്നുള്ള ശബ്ദം അനുവദനീയമായ പരിധി കവിയുന്നുവെന്നും അത്തരം ആചാരങ്ങൾ സമാധാനപരമായ അന്തരീക്ഷത്തിനുള്ള അവകാശത്തെ ലംഘിക്കുന്നുവെന്നും ഹർജിയിൽ പറയുന്നു . ആവർത്തിച്ച് പരാതി നൽകിയിട്ടും, അത്തരം ലൗഡ്‌സ്പീക്കറുകളുടെ ഉപയോഗത്തിനെതിരെ നടപടിയെടുക്കുന്നില്ലെന്നും ഹർജികളിൽ കൂട്ടിച്ചേർത്തു.

ലൗഡ്‌സ്പീക്കറുകളുടെയും ആംപ്ലിഫയറുകളുടെയും ഡെസിബെൽ പരിധികൾ കൃത്യമാക്കാൻ സർക്കാരിന് നിർദ്ദേശങ്ങൾ പുറപ്പെടുവിക്കാമെന്ന് കോടതി നിർദ്ദേശിച്ചു.ലംഘനങ്ങൾ കണ്ടെത്തിയാൽ, പോലീസ് ഉപകരണങ്ങൾ പിടിച്ചെടുത്ത് ഉചിതമായ നടപടി സ്വീകരിക്കണമെന്നും കോടതി കൂട്ടിച്ചേർത്തു.