ബ്രസീലിൽ ലുലയുടെ ചരിത്രവിജയം! വിദേശ ഇടപെടലുകൾക്കെതിരെ രാഷ്ട്രീയ മുന്നേറ്റം

ബ്രസീൽ : ഡൊണാൾഡ് ട്രമ്പിന്റെയും വിദേശ തന്ത്രങ്ങളെ തകർത്തെറിഞ്ഞ് ലൂയിസ് ഇനാസിയോ ലുല ഡാ സിൽവ നേടിയ ചരിത്ര വിജയം. ലുലയുടെ ഈ തിളക്കമാർന്ന ജയത്തിൽ അഭിമാനവും ആവേശവുമായി ഭാരതം. ആഗോള രാഷ്ട്രീയത്തിൽ വൻചലനങ്ങൾ സൃഷ്ടിച്ചുകൊണ്ട് ബ്രസീൽ പ്രസിഡന്റ് തിരഞ്ഞെടുപ്പിൽ ലൂയിസ് ഇനാസിയോ ലുല ഡാ സിൽവ നേടിയ ചരിത്രപരമായ വിജയം ലോകമെമ്പാടുമുള്ള ജനാധിപത്യ വിശ്വാസികൾക്ക് വലിയ ആവേശമാണ് പകർന്നു നൽകിയിരിക്കുന്നത്. അമേരിക്കൻ പ്രസിഡന്റ് ഡൊണാൾഡ് ട്രമ്പിന്റെയും ആഗോള വിദേശ ശക്തികളുടെയും കടന്നുകയറ്റങ്ങളെയും ഇടപെടലുകളെയും സധൈര്യം പ്രതിരോധിച്ചാണ് ലുല നാലാം തവണയും ബ്രസീലിന്റെ ഭരണസാരഥ്യത്തിലേക്ക് തിരിച്ചെത്തിയത്. അന്താരാഷ്ട്ര തലത്തിൽ ഏതെങ്കിലും വൻശക്തികളുടെയോ പണത്തിന്റെയും അധികാരത്തിന്റെയും മുമ്പിൽ ഒരിക്കലും അടിയറവ് പറയാതെ, സ്വന്തം രാജ്യത്തിന്റെ പരമാധികാരവും നയപരമായ സ്വയംഭരണവും ഉയർത്തിപ്പിടിക്കുന്ന ഭാരതത്തി​ന്റെ അതേ വിദേശനയ വീര്യവും ആത്മവിശ്വാസവുമാണ് ലുലയുടെ ഈ പോരാട്ടത്തിലും വിജയത്തിലും പ്രതിഫലിക്കുന്നത്.

അതുകൊണ്ടുതന്നെ, ഭാരതത്തിന്റെ ഉറച്ച സുഹൃത്തായ ലുലയുടെ ഈ തിളക്കമാർന്ന വിജയം ഇന്ത്യയും വളരെ ആവേശത്തോടെയും അഭിമാനത്തോടെയുമാണ് നോക്കിക്കാണുന്നത്.ഡിജിറ്റൽ മാധ്യമങ്ങളിലെ വ്യാജപ്രചാരണങ്ങളെയും വിദേശ ഇടപെടലുകളെയും അതിജീവിച്ച് 6.4 കോടി വോട്ടിന്റെ റെക്കോർഡ് ഭൂരിപക്ഷത്തോടെ ലുല അധികാരത്തിൽ തിരിച്ചെത്തിയത് ബ്രസീലിയൻ ജനതയുടെ ഇച്ഛാശക്തിയുടെ പ്രഖ്യാപനം കൂടിയാണ്. “ബ്രസീൽ ആരുടെയും പിൻമുറ്റമല്ല” എന്ന ലുലയുടെ ശക്തമായ പ്രഖ്യാപനം, ട്രമ്പിന്റെ നേതൃത്വത്തിലുള്ള സാമ്രാജ്യത്വ താൽപ്പര്യങ്ങൾക്കുള്ള കൃത്യമായ മറുപടിയായിരുന്നു. വൻശക്തികളുടെ സമ്മർദ്ദങ്ങൾക്ക് മുന്നിൽ നട്ടെല്ല് വളക്കാതെ, രാജ്യത്തിന്റെ അന്തസ്സും സ്വാതന്ത്ര്യവും സംരക്ഷിക്കാൻ ഏതറ്റം വരെയും പോരാടാമെന്ന് ലുല തെളിയിച്ചു തരുമ്പോൾ, അത് ഭാരതം എക്കാലത്തും ഉയർത്തിപ്പിടിക്കുന്ന ചേരിചേരാനയത്തിന്റെയും സ്വയംപര്യാപ്തതയുടെയും മൂല്യങ്ങളുമായി തികച്ചും ചേർന്നുപോകുന്നു.

ഈ ചരിത്രവിജയത്തിലൂടെ ലുലയുടെ നേതൃത്വത്തിലുള്ള പാർട്ടിക്ക് വരുംകാലങ്ങളിൽ കൂടുതൽ ശക്തമായ രാഷ്ട്രീയ മുന്നേറ്റം ഉണ്ടാകുമെന്നുറപ്പാണ്. രാജ്യത്തെ യുവാക്കളുടെയും സാധാരണക്കാരുടെയും ജീവിതം മെച്ചപ്പെടുത്തുന്നതിനൊപ്പം, ആഗോളതലത്തിൽ സ്വതന്ത്ര നിലപാടുകൾ പുലർത്തുന്ന രാഷ്ട്രങ്ങളുടെ കൂട്ടായ്മയെ കൂടുതൽ ശക്തിപ്പെടുത്താനും ലുലയുടെ ഈ വിജയം വഴിയൊരുക്കും. ഏത് വലിയ ശക്തികളുടെ സമ്മർദ്ദങ്ങളെയും ജനകീയ കരുത്തുകൊണ്ട് അതിജീവിക്കാൻ കഴിയുമെന്ന് തെളിയിച്ച ലുലയുടെ ഈ തിരിച്ചുവരവ്, ഭാരതത്തിന്റെ സുഹൃദ് രാജ്യമായ ബ്രസീലിന്റെ മാത്രമല്ല, ലോകമാകെ നീതിക്കായുള്ള പോരാട്ടങ്ങൾക്ക് പുതിയ ഊർജ്ജമാണ് പകർന്നു നൽകുന്നത്.