മധ്യപ്രദേശിൽ കോൺഗ്രസ് മുങ്ങിത്താഴുന്നു: 30 കോൺഗ്രസ് എം എൽ എമാർ രാജിവെക്കുമെന്ന് ബിജെപി

ഭോപ്പാൽ: മധ്യപ്രദേശിൽ കോണ്‍ഗ്രസ് നേതാവ് ജ്യോതിരാദിത്യ സിന്ധ്യ പാര്‍ട്ടി വിട്ടതിന് പിന്നാലെ 30 കോൺഗ്രസ് എം എൽ എമാർ ഇന്ന് തന്നെ രാജിവെക്കുമെന്ന പ്രഖ്യാപനവുമായി ബിജെപി. സംസ്ഥാനത്തെ മുൻ ആഭ്യന്തര മന്ത്രിയും മുതിർന്ന നേതാവുമായ ഭൂപേന്ദ്ര സിങ്ങാണ് ഇന്ന് തന്നെ 30 കോൺഗ്രസ് എംഎൽഎമാർ രാജിവെക്കുമെന്ന പ്രഖ്യാപനം നടത്തിയത്.

ഇപ്പോൾ ബെംഗളൂരുവിലുള്ള 19 എംഎൽഎമാർ രാജിവെച്ചതിനു പിന്നാലെയാണ് താൻ ഇവിടേക്ക് വന്നത്. ഇന്ന് വൈകീട്ടാകുമ്പോഴേക്ക് ഈ സംഖ്യ 30 ആയി ഉയരും. ബിജെപിയിൽ ചേരാൻ സന്നദ്ധത പ്രകടിപ്പിച്ച് നിരവധിയാളുകളാണ് സമീപിച്ചിരിക്കുന്നത്. ഇതുവരെ 22 എംഎൽഎമാർ രാജിവെച്ച് കഴിഞ്ഞെന്നും ഭൂപേന്ദ്ര സിങ് പറഞ്ഞു.

2018 ലെ നിയമസഭ തെരഞ്ഞെടുപ്പിന് തൊട്ടു പിന്നാലെ ആരംഭിച്ച രാഷ്ട്രീയ കരുനീക്കങ്ങളുമാണ് ജ്യോതിരാദിത്യ സിന്ധ്യയുടെ നേതൃത്വത്തിലുള്ള എംഎൽഎമാരുടെ രാജിയിൽ കലാശിച്ചത്. നിലവിൽ 230 അംഗ നിയമസഭയിൽ കോൺഗ്രസ് 114, ബിജെപി 107, ബി എസ് പി 2, എസ് പി ഒന്ന്, സ്വതന്ത്രർ 4 എന്നിങ്ങനെയായിരുന്നു കക്ഷി നില.