മലയിടംതുരുത്ത് കുടിയൊഴിപ്പിക്കൽ: മറ്റന്നാൾ പൂർത്തിയാക്കാൻ കോടതിയുടെ കർശന നിർദേശം; വീഴ്ചകളെക്കുറിച്ച് അന്വേഷിക്കാൻ ആഭ്യന്തരമന്ത്രിയുടെ ഉത്തരവ്

കൊച്ചി: മലയിടംതുരുത്തിലെ ഭൂമി കുടിയൊഴിപ്പിക്കലുമായി ബന്ധപ്പെട്ട കേസിൽ കർശന നിലപാടുമായി പെരുമ്പാവൂർ മുൻസിഫ് കോടതി. ശനിയാഴ്ചയ്ക്കുള്ളിൽ (മേയ് 23) കുടിയൊഴിപ്പിക്കൽ നടപടികൾ പൂർത്തിയാക്കണമെന്നാണ് കോടതിയുടെ കർശന നിർദേശം. ഉത്തരവ് കൃത്യമായി നടപ്പാക്കിയ ശേഷം 23-ാം തീയതി തന്നെ കോടതിയിൽ റിപ്പോർട്ട് സമർപ്പിക്കണം. നടപടികൾക്കായി എത്തുന്ന കോടതി ഉദ്യോഗസ്ഥർക്കും അഡ്വക്കേറ്റ് കമ്മിഷണർക്കും ആവശ്യമായ സുരക്ഷയൊരുക്കാൻ ആലുവ റൂറൽ പോലീസ് മേധാവിക്ക് കോടതി നിർദേശം നൽകിയിട്ടുണ്ട്.

കുടിയൊഴിപ്പിക്കലുമായി ബന്ധപ്പെട്ട് കഴിഞ്ഞ ദിവസങ്ങളിൽ ഉണ്ടായ പോലീസ് നടപടികളെക്കുറിച്ച് സമഗ്രമായ അന്വേഷണം നടത്താൻ ആഭ്യന്തരമന്ത്രി രമേശ് ചെന്നിത്തല ഉത്തരവിട്ടു. ഇതുസംബന്ധിച്ച് മൂന്ന് ദിവസത്തിനകം റിപ്പോർട്ട് സമർപ്പിക്കാൻ ആഭ്യന്തര വകുപ്പ് അഡീഷണൽ ചീഫ് സെക്രട്ടറി ബിശ്വനാഥ് സിൻഹയ്ക്ക് മന്ത്രി കത്ത് നൽകി. പോലീസ് മേധാവി റവാഡാ ചന്ദ്രശേഖരൻ വിഷയം അന്വേഷിച്ച് മൂന്ന് ദിവസത്തിനുള്ളിൽ റിപ്പോർട്ട് നൽകണമെന്നാണ് ആഭ്യന്തരമന്ത്രിയുടെ നിർദേശം.

മലയിടംതുരുത്തിലെ പോലീസ് നടപടിയിൽ എന്തെങ്കിലും തരത്തിലുള്ള വീഴ്ചകളോ പോരായ്മകളോ സംഭവിച്ചിട്ടുണ്ടോ എന്ന് കൃത്യമായി പരിശോധിക്കണമെന്ന് കത്തിൽ ആവശ്യപ്പെടുന്നുണ്ട്. കൂടാതെ, ഭാവിയിൽ സമാനമായ സാഹചര്യങ്ങൾ ഉണ്ടായാൽ ക്രമസമാധാനപാലനത്തിൽ വരുത്തേണ്ട മാറ്റങ്ങളെക്കുറിച്ചും സ്വീകരിക്കേണ്ട മുൻകരുതലുകളെക്കുറിച്ചും വ്യക്തമായ നിർദ്ദേശങ്ങൾ സമർപ്പിക്കാനും അഡീഷണൽ ചീഫ് സെക്രട്ടറിക്ക് നൽകിയ കത്തിൽ ആഭ്യന്തരമന്ത്രി നിർദ്ദേശിച്ചിട്ടുണ്ട്.