ചൊവ്വയുടെ കാവൽക്കാരൻ നിശബ്ദനായി !!! മേവൻ പേടകവുമായുള്ള ആശയവിനിമയ ബന്ധം നഷ്ടമായെന്ന് നാസ ! പേടകം നഷ്ടമാകുമോയെന്ന് ആശങ്ക

വാഷിങ്ടൺ ഡിസി : ചൊവ്വയുടെ അന്തരീക്ഷത്തെക്കുറിച്ചും അവിടെയുണ്ടായിരുന്ന ജലാംശം എങ്ങനെ നഷ്ടപ്പെട്ടു എന്നതിനെക്കുറിച്ചും പഠിക്കാൻ നിയോഗിക്കപ്പെട്ട നാസയുടെ ‘മേവൻ’ (Mars Atmosphere and Volatile Evolution – MAVEN) പേടകം സാങ്കേതിക പ്രതിസന്ധിയിൽ. ഡിസംബർ നാലാം തീയതി മുതൽ പേടകവുമായുള്ള ആശയവിനിമയം പൂർണ്ണമായും നിലച്ചിരിക്കുകയാണെന്ന വിവരം ഡിസംബർ 15-ന് പുറത്തുവിട്ട വാർത്താക്കുറിപ്പിൽ നാസ സ്ഥിരീകരിച്ചു. പേടകത്തെ തിരികെ ബന്ധപ്പെടാൻ നിരവധി ശ്രമങ്ങൾ നടത്തിയെങ്കിലും ഇതുവരെ ഫലമുണ്ടായിട്ടില്ല. ഡിസംബർ ആറിന് പേടകത്തിൽ നിന്നും ലഭിച്ച ചെറിയൊരു സിഗ്നൽ പരിശോധിച്ചപ്പോൾ സാഹചര്യം കൂടുതൽ സങ്കീർണ്ണമാണെന്നാണ് ശാസ്ത്രജ്ഞർ വിലയിരുത്തുന്നത്. ചൊവ്വയുടെ മറുവശത്തുനിന്നും പേടകം പുറത്തുവന്നപ്പോൾ അത് അപ്രതീക്ഷിതമായ രീതിയിൽ കറങ്ങിക്കൊണ്ടിരിക്കുകയായിരുന്നു എന്നാണ് ലഭ്യമായ ഡാറ്റ സൂചിപ്പിക്കുന്നത്. കൂടാതെ, പേടകത്തിന്റെ ഭ്രമണപഥത്തിൽ മാറ്റം സംഭവിച്ചിരിക്കാനുള്ള സാധ്യതയും ശാസ്ത്രജ്ഞർ തള്ളിക്കളയുന്നില്ല.

2013 നവംബറിലാണ് മേവൻ വിക്ഷേപിക്കപ്പെട്ടത്. പത്തു മാസത്തെ യാത്രയ്ക്ക് ശേഷം ചൊവ്വയുടെ ഭ്രമണപഥത്തിലെത്തിയ പേടകം സൂര്യനിൽ നിന്നുള്ള സൗരവാതങ്ങൾ ചൊവ്വയുടെ അന്തരീക്ഷത്തിൽ എങ്ങനെയൊക്കെയാണ് സ്വാധീനം ചെലുത്തുന്നത് എന്നതിനെക്കുറിച്ചാണ് പ്രധാനമായും പഠിച്ചത്. ഒരു വർഷത്തെ കാലാവധി ലക്ഷ്യമിട്ട് തുടങ്ങിയ ദൗത്യം വിജയകരമായി പൂർത്തിയാക്കിയെങ്കിലും പേടകം വീണ്ടും വർഷങ്ങളോളം പ്രവർത്തനം തുടർന്നു. കോടിക്കണക്കിന് വർഷങ്ങൾക്ക് മുൻപ് ചൊവ്വയിൽ ദ്രവരൂപത്തിൽ ജലം ഒഴുകിയിരുന്നതായും പിന്നീട് അവിടുത്തെ കട്ടിയുള്ള അന്തരീക്ഷം എങ്ങനെ നഷ്ടപ്പെട്ടുവെന്നും മനസ്സിലാക്കാൻ മേവൻ നൽകിയ വിവരങ്ങൾ ശാസ്ത്രലോകത്തെ വളരെയധികം സഹായിച്ചു. ഇതിനുപുറമെ ചൊവ്വയിലെ പൊടിക്കാറ്റുകൾ, കാറ്റിന്റെ വേഗത, ധ്രുവദീപ്തി (Auroras) എന്നിവയെക്കുറിച്ചുള്ള വിലപ്പെട്ട വിവരങ്ങളും മേവൻ ഭൂമിയിലേക്ക് അയച്ചിരുന്നു.

മേവൻ ദൗത്യത്തിന്റെ മറ്റൊരു പ്രധാന ചുമതല ചൊവ്വയുടെ ഉപരിതലത്തിൽ പര്യവേഷണം നടത്തുന്ന നാസയുടെ ക്യൂരിയോസിറ്റി, പെർസീവിയറൻസ് എന്നീ റോവറുകളും ഭൂമിയിലെ കൺട്രോൾ റൂമും തമ്മിലുള്ള ആശയവിനിമയ കണ്ണിയായി പ്രവർത്തിക്കുക എന്നതായിരുന്നു. റോവറുകൾ ശേഖരിക്കുന്ന വിവരങ്ങൾ ഭ്രമണപഥത്തിലുള്ള മേവൻ സ്വീകരിക്കുകയും അത് ഭൂമിയിലേക്ക് അയക്കുകയുമാണ് ചെയ്തിരുന്നത്. മേവൻ നിശബ്ദമായതോടെ ഈ ആശയവിനിമയ സംവിധാനത്തിന് താൽക്കാലികമായി തടസ്സം നേരിട്ടിരിക്കുകയാണ്. എങ്കിലും നാസയുടെ തന്നെ മാർസ് റിക്കണൈസൻസ് ഓർബിറ്റർ, മാർസ് ഒഡീസി, യൂറോപ്യൻ സ്പേസ് ഏജൻസിയുടെ മാർസ് എക്സ്പ്രസ്, എക്സോമാർസ് ട്രേസ് ഗ്യാസ് ഓർബിറ്റർ എന്നീ പേടകങ്ങൾ ഇപ്പോഴും പ്രവർത്തനസജ്ജമായതിനാൽ റോവറുകളുടെ പ്രവർത്തനം തടസ്സപ്പെടില്ലെന്ന് നാസ വ്യക്തമാക്കിയിട്ടുണ്ട്.

നിലവിലെ സാഹചര്യം കണക്കിലെടുത്ത് അടുത്ത രണ്ടാഴ്ചത്തെ റോവർ പ്രവർത്തനങ്ങൾക്കായി മറ്റ് ഓർബിറ്ററുകളുടെ സേവനം നാസ ക്രമീകരിച്ചിട്ടുണ്ട്. ഇതിനനുസരിച്ച് പെർസീവിയറൻസ്, ക്യൂരിയോസിറ്റി ടീമുകൾ തങ്ങളുടെ ദൈനംദിന കർമ്മപദ്ധതികളിൽ മാറ്റം വരുത്തിയിട്ടുണ്ട്. 2022-ൽ ചൊവ്വയിൽ സൗരവാതങ്ങളുടെ പ്രവാഹം രണ്ടു ദിവസത്തേക്ക് നിലച്ചപ്പോൾ അവിടുത്തെ അന്തരീക്ഷം നാലിരട്ടിയോളം വികസിച്ചത് നിരീക്ഷിച്ചതുൾപ്പെടെയുള്ള വിസ്മയകരമായ കണ്ടെത്തലുകൾ മേവന്റെ അക്കൗണ്ടിലുണ്ട്. ഈ പേടകത്തെ വീണ്ടും പ്രവർത്തനസജ്ജമാക്കാൻ സാധിക്കുമോ അതോ ഇതൊരു ദൗത്യത്തിന്റെ അവസാനമാണോ എന്നറിയാൻ വരും ദിവസങ്ങളിലെ ശാസ്ത്രീയ പരിശോധനകൾ നിർണ്ണായകമാകും.