‘മോദിയുടെ റഷ്യ സന്ദർശനത്തെ പാശ്ചാത്യ രാജ്യങ്ങൾ അസൂയയോടെ വീക്ഷിക്കുന്നു’; നിർണായക കൂടിക്കാഴ്ചയാണ് നടക്കാൻ പോകുന്നതെന്ന് ദിമിത്രി പെസ്‌കോവ്

ദില്ലി: പ്രധാനമന്ത്രി നരേന്ദ്രമോദിയുടെ റഷ്യ സന്ദർശനത്തെ പാശ്ചാത്യ രാജ്യങ്ങൾ അസൂയയോടെയാണ് വീക്ഷിക്കുന്നതെന്ന് ക്രെംലിൻ വക്താവ് ദിമിത്രി പെസ്‌കോവ്. ഒരു ടെലിവിഷൻ ചാനലിന് നൽകിയ അഭിമുഖത്തിലാണ് പെസ്‌കോവിന്റെ പ്രതികരണം. ഏറെ പ്രധാനപ്പെട്ടതും നിർണായകവുമായ സന്ദർശനമായിട്ടാണ് റഷ്യ ഇതിനെ പരിഗണിക്കുന്നതെന്നും അദ്ദേഹം പറഞ്ഞു.

”പാശ്ചാത്യ രാജ്യങ്ങൾ പ്രധാനമന്ത്രിയുടെ റഷ്യയിലേക്കുള്ള വരവിനെ ഏറെ അസൂയയോടെയാണ് കാണുന്നത്. അതിനർത്ഥം അവർ ഈ സന്ദർശനത്തെ സൂക്ഷ്മമായി നിരീക്ഷിക്കുന്നുണ്ടെന്നാണ്. അവരും വലിയ പ്രാധാന്യം ഈ വിഷയത്തിന് നൽകുന്നുണ്ട്. അവരെ തെറ്റ് പറയാൻ സാധിക്കില്ല, കാരണം ഏറെ നിർണായകവും പ്രാധാന്യമുള്ളതുമായ കൂടിക്കാഴ്ചയാണ് നടക്കാൻ പോകുന്നത്” എന്ന് പെസ്‌കോവ് പറയുന്നു.

22ാമത് ഇന്ത്യ-റഷ്യ വാർഷിക ഉച്ചകോടിയിൽ പങ്കെടുക്കുന്നതിന് വേണ്ടി പ്രസിഡന്റ് വ്‌ളാഡിമിർ പുടിന്റെ പ്രത്യേക ക്ഷണപ്രകാരമാണ് പ്രധാനമന്ത്രി ഇന്ന് റഷ്യയിലേക്ക് തിരിക്കുന്നത്. ഇരുനേതാക്കളും സമകാലിക, ആഗോള, പ്രാദേശിക വിഷയങ്ങൾ കാഴ്ചപ്പാടുകൾ കൈമാറുമെന്ന് വിദേശകാര്യമന്ത്രാലയം പുറത്ത് വിട്ട പ്രസ്താവനയിൽ പറയുന്നു. അഞ്ച് വർഷത്തിന് ശേഷമാണ് പ്രധാനമന്ത്രിയുടെ റഷ്യ സന്ദർശനം നടക്കുന്നത്.