അനന്തപുരിയിലെ വിജ്ഞാന സമൂഹം കാത്തിരുന്ന നേതി നേതി കോൺക്ലേവ് 23 ന് ! ആശയ സമൃദ്ധമായ സംവാദങ്ങൾക്ക് പ്രമുഖരെത്തും, തത്സമയക്കാഴ്ച ഒരുക്കി തത്വമയി

തിരുവനന്തപുരം: അനന്തപുരിയുടെ വിജ്ഞാന സമൂഹം കാത്തിരുന്ന നേതി നേതി സെമിനാർ ഞായറാഴ്ച. തിരുവനന്തപുരം തമ്പാനൂർ ഹോട്ടൽ കോർഡിയൽ സ്വപാനത്തിൽ രാവിലെ 9.30 മുതൽ ഉച്ചയ്ക്ക് 1.30 വരെയാണ് കോൺക്ലേവ്. പരിപാടി തത്വമയി തത്സമയം സംപ്രേഷണം ചെയ്യും

നേതി നേതിയുടെ അദ്ധ്യക്ഷനും മുൻ ഇൻസ്‌പെക്ടർ ജനറലുമായ എസ് ഗോപിനാഥിന്റെ അദ്ധ്യക്ഷതയിൽ ചേരുന്ന യോഗത്തിൽ നുറുൽ ഇസ്ലാം യൂണിവേഴ്സിറ്റി വൈസ് ചാൻസിലറും മുൻ ഡി ആർ ഡി ഒ ഡയറക്ടർ ജനറലുമായ ഡോ. ടെസ്സി തോമസ് കോൺക്ലേവ് ഉദ്ഘാടനം ചെയ്യും. മുൻ കേരളാ പോലീസ് മേധാവി ഡോ ടി പി സെൻകുമാർ മുഖ്യ പ്രഭാഷണം നടത്തും.

ഹിന്ദുത്വത്തിന്റെ ഉയർച്ച എന്ന വിഷയത്തിൽ നടക്കുന്ന ചർച്ചയിൽ കാലടി സംസ്കൃത സർവ്വകലാശാല മുൻ വൈസ് ചാൻസിലറും മുൻ പി എസ് സി ചെയർമാനുമായ ഡോ കെ എസ് രാധാകൃഷ്ണൻ, അഭിനവ ഗുപ്ത ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് സ്റ്റഡിസ് ഡയറക്ടർ ആർ രാമാനന്ദൻ എന്നിവർ പങ്കെടുക്കും. മുതിർന്ന മദ്ധ്യമപ്രവർത്തകൻ ജി കെ സുരേഷ്ബാബു ചർച്ചയിൽ മോഡറേറ്റർ ആയിരിക്കും.സമാപന സമ്മേളനം മുൻ വിദേശകാര്യ സഹമന്ത്രി വി മുരളീധരൻ ഉദ്ഘാടനം ചെയ്യും

വിവരങ്ങളുടെ പ്രളയവും എന്നാൽ വ്യക്തതയുടെ അഭാവവും നിഴലിക്കുന്ന ഈ കാലഘട്ടത്തിൽ ബൗദ്ധിക സമഗ്രതയുടെയും, സൃഷ്ടിപരമായ ചർച്ചകളുടെയും ആശയ സമൃദ്ധമായ സംവാദങ്ങളുടെയും ദീപനാളമായി പ്രവർത്തിക്കുന്ന സംഘടനയാണ് നേതി നേതി. ചിന്തോദ്ദീപങ്ങളായ നിരവധി സെമിനാറുകളും ചർച്ചകളും സംവാദങ്ങളും സംഘടിപ്പിക്കുന്ന നേതി നേതി വിഷയ വിദഗ്ധരേയും വിജ്ഞാന ദാഹികളെയും വിവര വിനിമയത്തിനായി ഒരുമിപ്പിക്കുന്നു.