ഭാരതത്തിന്റെ പുതിയ ക്രിമിനൽ നീതിന്യായ വ്യവസ്ഥ: അവസരങ്ങളും വെല്ലുവിളികളും എന്ന വിഷയത്തിൽ നേതി നേതി സെമിനാർ ആഗസ്റ്റ് മൂന്നിന്; മുൻ നിയമവകുപ്പ് അഡീഷണൽ സെക്രട്ടറി ഡോ. സി രാമകൃഷ്ണൻ നായർ, എൻ ഐ എ സ്റ്റാന്റിംഗ് കൗൺസെൽ അഡ്വ. ശാസ്തമംഗലം അജിത്ത് തുടങ്ങിയവർ സംസാരിക്കും; തത്സമയ സംപ്രേക്ഷണം തത്വമയി നെറ്റ്‌വർക്കിൽ

നേതി നേതിയുടെ സെമിനാർ പരമ്പരയിലെ പുതിയ അദ്ധ്യായം ആഗസ്റ്റ് 03 ന് നടക്കും. ‘ഭാരതത്തിന്റെ പുതിയ ക്രിമിനൽ നീതിന്യായ വ്യവസ്ഥ; അവസരങ്ങളും വെല്ലുവിളികളും’ എന്ന വിഷയത്തിൽ തിരുവനന്തപുരം നാഷണൽ ക്ലബ്ബിലെ രാമൻ നായർ ഹാളിൽ വൈകുന്നേരം 4.30 നാണ് സെമിനാർ. മുൻ നിയമവകുപ്പ് അഡീഷണൽ സെക്രട്ടറി ഡോ. സി രാമകൃഷ്ണൻ നായർ, എൻ ഐ എ സ്റ്റാന്റിംഗ് കൗൺസെൽ അഡ്വ. ശാസ്തമംഗലം അജിത്ത് തുടങ്ങിയവർ സംസാരിക്കും.

സ്വാതന്ത്യാനന്തരം നീണ്ട 75 വർഷങ്ങൾ നമ്മുടെ നീതിന്യായ വ്യവസ്ഥയെ നിയന്ത്രിച്ചത് ബ്രിട്ടീഷുകാർ നമ്മുടെ സ്വാതന്ത്ര്യ സമര ഭടന്മാരെ തടവറകളിൽ ബന്ധിക്കാൻ നിർമ്മിച്ച അതെ ക്രിമിനൽ നിയമങ്ങളായിരുന്നു. ശിക്ഷ ഉറപ്പാക്കുക എന്നതിൽ നിന്ന് നീതി ഉറപ്പാക്കുക എന്ന ലക്ഷ്യത്തിലേക്ക് ഇന്ത്യൻ നീതിന്യായ വ്യവസ്ഥയെ മാറ്റിയ ചരിത്ര നിയമനിർമ്മാണമായിരുന്നു ക്രിമിനൽ നിയമങ്ങളുടെ പരിഷ്‌കരണം. ഭാരതത്തിന്റെ നീതിന്യായ ചരിത്രത്തിലെ ഏറ്റവും നിർണ്ണായകമായ അദ്ധ്യായവും. ഭാരതീയ ന്യായ സംഹിതയും, ഭാരതീയ നാഗരിക് സുരക്ഷാ സംഹിതയും ഭാരതീയ സാക്ഷ്യ അധിനിയവും വിശദമായ ചർച്ചകൾക്ക് വിധേയമാകുന്ന അവസരത്തിൽ ഈ നിയമങ്ങളുടെ അതിസൂക്ഷ്മമായ വിശകലനവും, നിയമപരമായ ഉദ്ദേശ്യവും, പ്രായോഗിക ബുദ്ധിമുട്ടുകളും സെമിനാറിൽ ചർച്ചയാകുമെന്ന് നേതി നേതി ഭാരവാഹികൾ അറിയിച്ചു

ചർച്ചയുടെ ആദ്യാവസാന നിമിഷങ്ങൾ തത്വമയി നെറ്റ്‌വർക്കിലൂടെ ലോകമെമ്പാടുള്ള പ്രേക്ഷകർക്ക് വീക്ഷിക്കാവുന്നതാണ് ഇതിനായി https://bit.ly/TatwaLive എന്ന ലിങ്കിൽ പ്രവേശിക്കാവുന്നതാണ്