മഴക്കുഴിയെടുത്ത തൊഴിലുറപ്പ് തൊഴിലാളികളെ അമ്പരപ്പിച്ച് മണ്ണിനടിയിൽ നിധികുംഭം! ബോംബാണെന്ന് കരുതി ആദ്യം മാറിനിന്നു, പിന്നീട് തുറന്ന് നോക്കിയപ്പോൾ നാണയങ്ങളും സ്വർണ്ണാഭരണങ്ങളും

കണ്ണൂർ ശ്രീകണ്ഠാപുരത്ത് റബർ തോട്ടത്തിൽ നിന്ന് നിധിയെന്ന് സംശയിക്കുന്ന വസ്തുക്കൾ കണ്ടെത്തി. പരിപ്പായി ഗവൺമെൻറ് എൽപി സ്കൂളിനടുത്ത് സ്വകാര്യവ്യക്തിയുടെ റബർ തോട്ടത്തിൽ മഴക്കുഴികൾ നിർമ്മിച്ച തൊഴിലുറപ്പ് തൊഴിലാളികളാണ് ആഭരണങ്ങളും നാണയങ്ങളും അടങ്ങുന്ന കുടം കണ്ടെത്തിയത്.

ബോംബ് ആണെന്ന് കരുതി ആദ്യം തൊഴിലാളികള്‍ ഇത് തുറന്നുനോക്കിയിരുന്നില്ല. പിന്നീട് തുറന്നു നോക്കിയതിന് ശേഷം ഉടന്‍ തന്നെ പഞ്ചായത്ത് പ്രസിഡന്‍റിനെ ഇക്കാര്യം അറിയിക്കുകയായിരുന്നു. 17 മുത്തുമണികള്‍, 13 സ്വർണ്ണപതക്കങ്ങള്‍, കാശിമാലയുടെ നാല് പതക്കങ്ങള്‍, ഒരു സെറ്റ് കമ്മല്‍, വെള്ളി നാണയങ്ങള്‍ എന്നിവയാണ് കുടത്തിനുള്ളിലുണ്ടായിരുന്നത്. വെള്ളിനാണയങ്ങളിലൊന്നും വർഷം രേഖപ്പെടുത്തിയിട്ടില്ല. പൊലീസ് വസ്തുക്കൾ തളിപ്പറമ്പ് കോടതിയിൽ ഹാജരാക്കിയിരിക്കുകയാണ്. ഇവ സ്വർണ്ണം പൂശിയതാണോ എന്നും സംശയമുണ്ട്. കാലപ്പഴക്കമടക്കമുള്ള കാര്യങ്ങൾ പുരാവസ്തു വകുപ്പ് പരിശോധിക്കും.