നയിക്കാൻ ഇനി വി നാരായണൻ !! കാലാവധി പൂർത്തിയാക്കിയ ഐഎസ്ആർഒ ചെയർമാൻ എസ് സോമനാഥ് സ്ഥാനമൊഴിഞ്ഞു ; ചുമതലയേറ്റ് പുതിയ ചെയർമാൻ വി നാരായണൻ

കാലാവധി പൂർത്തിയാക്കിയ ഐഎസ്ആർഒ ചെയർമാൻ എസ് സോമനാഥ് സ്ഥാനമൊഴിഞ്ഞു. പുതുതായി തെരഞ്ഞെടുക്കപ്പെട്ട ചെയർമാനായ വി. നാരായണൻ ചുമതലയേറ്റു . എസ് സോമനാഥ് കഴിഞ്ഞ ദിവസം വി നാരായണന് ചുമതലകൾ കൈമാറിയിരുന്നു. എസ് സോമനാഥിന് ഐഎസ്ആർഒ ഉദ്യോഗസ്ഥർ യാത്രയയപ്പ് നൽകി. പുതുതായി ചുമതലയേറ്റ വി നാരായണൻ ഐഎസ്ആർഒ ചെയർമാൻ സ്ഥാനത്തിന് പുറമെ കേന്ദ്രസർക്കാരിന്റെ ബഹിരാകാശ വകുപ്പ് സെക്രട്ടറിസ്ഥാനവും വഹിക്കും.

ജിഎസ്എൽവി, എംകെ-3, ക്രയോജനിക് എഞ്ചിൻ ഉൾപ്പെടെയുള്ള പദ്ധതികളിൽ പ്രധാന പങ്കുവഹിച്ച വി നാരായണൻ ഇനി 2 വർഷം കൂടി ഈ സ്ഥാനങ്ങളിൽ തുടരും. തമിഴ്‌നാട്ടിലെ കന്യാകുമാരി ജില്ലയിലെ മേലാട്ടുവിളൈ ഗ്രാമത്തിൽ നിന്നുള്ളയാളാണ് നാരായണൻ. പരേതനായ വന്നിയപെരുമാളിന്റെയും എസ്.തങ്കമ്മാളിന്റെയും മൂത്ത മകനാണ്.