വിനോദവ്യവസായത്തിൽ നിന്ന് ആത്മീയതയിലേക്ക് ; നൂപുർ അലങ്കാറിന്റെ തീരുമാനത്തിൽ ഞെട്ടൽ മാറാതെ ആരാധകര്‍

വിനോദവ്യവസായത്തിൽ നിന്ന് പിന്മാറുകയാണെന്ന പ്രഖ്യാപനവുമായി നടി നൂപുർ അലങ്കാർ. മൂന്നു പതിറ്റാണ്ടോളം വിവിധ പരിപാടികളിലൂടെ കാണികളുടെ ഹൃദയം കവർന്ന ടിവി താരം താൻ ആത്മീയപാത സ്വീകരിച്ചതായി പ്രഖ്യാപിക്കുകയായിരുന്നു. നടി സന്യാസം സ്വീകരിച്ചെന്ന വാർത്ത ഞെട്ടലോടെയാണ് ആരാധകർ കേട്ടത്. കാവി വസ്ത്രം ധരിച്ചു താരം മുൻപു പ്രത്യക്ഷപ്പെട്ടിട്ടുണ്ടെങ്കിലും ശരിക്കും സന്യാസത്തിലേക്കു വഴിമാറിയത് അപ്രതീക്ഷിതമെന്ന് ആരാധകർ പറയുന്നു. ഷൂട്ടിങ് ഉപേക്ഷിച്ച നടി ഇപ്പോൾ ഹിമാലയ യാത്രയിലാണ്. ‘‘ആത്മീയതയോട് എനിക്കെപ്പോഴും ഇഷ്ടമുണ്ടായിരുന്നു. ‘അധ്യാത്മകത’ പിന്തുടരുന്നുമുണ്ടായിരുന്നു. പൂർണമായും ആത്മീയതയിലേക്ക് എന്നെ അർപ്പിക്കാനുള്ള സമയമായി’’– ഇടൈംസിനോട് നൂപുർ പറഞ്ഞു.

‘‘ജീവിതത്തിൽ ഇനി നാടകീയതയ്ക്ക് ഇടമില്ലാത്തതിനാൽ അഭിനയം ‘മിസ്’ ചെയ്തെന്ന തോന്നലുണ്ടാവില്ല. എല്ലാത്തരം വേഷങ്ങളും അഭിനയിച്ചു. 2020 ഡിസംബറിൽ അമ്മ മരിച്ചതിനുശേഷം, എന്തെങ്കിലും നഷട്പ്പെടുമെന്നോർത്ത് ദുഃഖിക്കേണ്ടതില്ലെന്ന് തിരിച്ചറിഞ്ഞു. എല്ലാ പ്രതീക്ഷകളിൽനിന്നും കർത്തവ്യങ്ങളിൽനിന്നും മോചിതയായതുപോലെ തോന്നി.

കുടുംബജീവിതം ഉപേക്ഷിച്ചു സന്യാസം തിരഞ്ഞെടുത്തപ്പോൾ ഭർത്താവിന്റെ പ്രതികരണം എങ്ങനെയെന്നതിനെക്കുറിച്ചു നടിയോടു പ്രതികരണം ആരാഞ്ഞിരുന്നു. ‘‘ഞാനതു ചോദിച്ചില്ല . ഞാനെങ്ങോട്ടാണു പോകുന്നതെന്ന് അദ്ദേഹത്തിന് അറിയാമായിരുന്നു. സന്യാസത്തെക്കുറിച്ചു നേരത്തേതന്നെ അദ്ദേഹവുമായി സംസാരിച്ചിട്ടുണ്ട്. അദ്ദേഹവും കുടുംബവും എന്റെ തീരുമാനം അംഗീകരിച്ച് എന്നെ സ്വതന്ത്രയാക്കി. വിവാഹബന്ധം ഇതുവരെയും മികച്ചതായിരുന്നു. വേർപിരിയുന്നതിനായി നിയമവഴി സ്വീകരിച്ചിട്ടില്ല. അലങ്കാറിന് എല്ലാ ഭാവുകങ്ങളും നേരുന്നു’’– താരം പറഞ്ഞു.