ഓണം ബംപർ ലോട്ടറി;ശരിക്കും ബംപറടിച്ചത് സർക്കാരിന് ! ടിക്കറ്റ് വിൽപന പൊടി പൊടിക്കുന്നു; ഇതുവരെ വിറ്റത് 20.5 ലക്ഷം ടിക്കറ്റുകൾ!

തിരുവനന്തപുരം : ഓണം ബംപർ ലോട്ടറിക്ക് മുൻപെങ്ങുമില്ലാത്തവിധം വൻ ഡിമാൻഡ്. ജൂലൈ 27ന് ടിക്കറ്റ് വിൽപന ആരംഭിച്ചതു മുതൽ ഇന്നലെ വരെ റെക്കോർഡ് വേഗത്തിലാണ് ടിക്കറ്റ് വിൽപന പുരോഗമിക്കുന്നത്. വിറ്റ ടിക്കറ്റുകളുടെ എണ്ണം ഇതിനോടകം 20.5 ലക്ഷം കടന്നു എന്നാണ് ലഭിക്കുന്ന ഏറ്റവും പുതിയ വിവരം. 30 ലക്ഷം ടിക്കറ്റുകളാണ് ഇതുവരെ അച്ചടിച്ചത്. പരമാവധി 90 ലക്ഷം ടിക്കറ്റുവരെ അച്ചടിക്കാൻ അനുമതിയുണ്ട്. 25 കോടിയാണ് ഒന്നാം സമ്മാനം. കഴിഞ്ഞവർഷം ഇതേകാലയളവിൽ വിറ്റത് 12.83 ലക്ഷം ടിക്കറ്റുകളായിരുന്നു. 500 രൂപയാണ് ടിക്കറ്റ് വില.

പാലക്കാടാണ് ടിക്കറ്റ് വിൽപ്പനയിൽ മുന്നിൽ. തിരുവനന്തപുരമാണ് രണ്ടാം സ്ഥാനത്ത് .തൃശൂർ, എറണാകുളം, കോട്ടയം ജില്ലകൾ തൊട്ടുപിന്നിലുണ്ട്. 25 കോടി സമ്മാനത്തുകയിൽ 10% ഏജന്റിന്റെ കമ്മിഷനായിപോകും. ശേഷിക്കുന്ന തുകയിൽ 30% നികുതി കഴിച്ചുള്ള തുകയാണ് ജേതാവിനു ലഭിക്കുക.

ഇത്തവണ ആകെ സമ്മാനത്തുക 125 കോടി 54 ലക്ഷം രൂപയാണ്. രണ്ടാം സമ്മാനം 20 കോടി രൂപയാണ്. അതായത് ഒരു കോടി രൂപ വീതം 20 പേർക്ക് ഇത് ലഭിക്കും. മൂന്നാം സമ്മാനം 50 ലക്ഷം വീതം 20 പേർക്കാണ്. നാലാം സമ്മാനം 5 ലക്ഷം വീതം 10 പേർക്ക്. അഞ്ചാം സമ്മാനം 2 ലക്ഷം വീതം പത്തു പേർക്ക്. ഇതിനു പുറമേ 5000, 2000, 1000, 500 രൂപയുടെ നിരവധി സമ്മാനങ്ങളുമുണ്ട്. 12.55 കോടിരൂപയാണ് ഏജൻസി കമ്മിഷൻ.