സംസ്ഥാനത്തെ ഓണകിറ്റ് വിതരണം പാളി; കിറ്റുകൾ തയ്യാറായത് തിരുവനന്തപുരത്ത് മാത്രംമറ്റ് ജില്ലകളിൽ വിതരണം നാളെ മുതൽ, കശുവണ്ടി പായസം മിക്സ് എന്നിവ എല്ലായിടത്തും എത്തിയില്ലെന്ന് ഭക്ഷ്യ മന്ത്രി

തിരുവനന്തപുരം: സംസ്ഥാനത്തെ ഓണകിറ്റ് വിതരണം പാളി. കിറ്റുകൾ തിരുവനന്തപുരത്ത് മാത്രമാണ് വിതരണം ചെയ്ത് തുടങ്ങിയത്. ഓണം മുറ്റത്ത് എത്തിയിട്ടും ഇതുവരെ കിറ്റ് വിതരണം നടക്കാത്തത് വലിയ ചർച്ചക്കിടയാക്കിയിരുന്നു. കശുവണ്ടി പായസം മിക്സ് എന്നിവ എല്ലായിടത്തും എത്തിയില്ലെന്നും മറ്റ് ജില്ലകളിൽ വിതരണം നാളെ മുതൽ മാത്രമേ തുടങ്ങൂ എന്ന വിശദീകരണമാണ് മന്ത്രി നൽകിയത്.
ഓണക്കിറ്റിൽ ഉൾപ്പെടുത്തിയിരിക്കുന്ന സാധനങ്ങൾ സപ്ലൈകോയിൽ നിലവിൽ സ്റ്റോക്കില്ലാത്തതാണ് വിതരണം വൈകിയതിനുള്ള കാരണമായി മന്ത്രി പറഞ്ഞത്. അതേപോലെ ഇത്തവണ എല്ലാവർക്കും ഓണകിറ്റ് ലഭിക്കില്ലെന്നത് കേരളം ഒന്നടങ്കം ചർച്ചയായിരിക്കുകയാണ്. കിറ്റ് എല്ലാവർക്കും ഇല്ലെന്നത് മാത്രമല്ല സബ്‌സിഡി സാധനങ്ങൾ സപ്ലൈകോയിൽ ലഭ്യമാകുന്നില്ലെന്നതും വലിയ പ്രതിസന്ധിക്ക് കാരണമായിരിക്കുകയാണ്. അതേസമയം അവശ്യ സാധനങ്ങൾക്ക് പോലും വില വർദ്ധിക്കുന്നതും ഏറെ പ്രയാസപ്പെടുത്തുകയാണ്.

ഇത്തവണ ജനങ്ങൾക്ക് വലിയ തിരിച്ചടിയാണ് സർക്കാർ നൽകുന്നത്. ഓണക്കിറ്റ് മഞ്ഞക്കാർഡ് ഉടമകൾക്കും ക്ഷേമസ്ഥാപനങ്ങളിലെ അന്തേവാസികൾക്കും മാത്രമായി നൽകുവാനാണ്‌ സർക്കാർ തീരുമാനം. തേയില, ചെറുപയർപരിപ്പ്, സേമിയ പായസം മിക്സ്, നെയ്യ്, കശുവണ്ടിപ്പരിപ്പ്, വെളിച്ചെണ്ണ, സാമ്പാർപൊടി, മുളകുപൊടി, മഞ്ഞൾപൊടി, മല്ലിപ്പൊടി, ചെറുപയർ, തുവരപ്പരിപ്പ്, പൊടിഉപ്പ് തുടങ്ങിയവയാണ് ഇത്തവണത്തെ കിറ്റിലെ സാധനങ്ങൾ. കഴിഞ്ഞതവണ ഓരോ ഇനത്തിന്റെയും തൂക്കവും ബ്രാൻഡ് പേരും സപ്ലൈകോ മുൻകൂട്ടി പ്രചരിപ്പിച്ചിരുന്നു. വില ഉയർന്നുനിൽക്കുന്നതിനാൽ ഏലയ്ക്കയും, ശർക്കരവരട്ടിയും ഉണക്കലരിയും പഞ്ചസാരയുമൊക്കെ കിറ്റിൽനിന്ന് പുറത്തായിരിക്കുകയാണ്.