ഇന്ത്യൻ കുപ്പായത്തിൽ ഒരു ഏകദിനവും ഒരു ടി ട്വൻറിയും ! ക്രിക്കറ്റിലെ എല്ലാ ഫോർമാറ്റിൽനിന്നും വിരമിക്കൽ പ്രഖ്യാപിച്ച് ജമ്മു കശ്മീരിന്റെ മിന്നും താരം

ശ്രീനഗർ : ക്രിക്കറ്റിലെ എല്ലാ ഫോർമാറ്റിൽനിന്നും വിരമിക്കൽ പ്രഖ്യാപിച്ച് ഇന്ത്യൻ താരം പർവേസ് റസൂൽ. ജമ്മു കശ്‌മീരിൽനിന്ന് ദേശീയ ടീമിൽ ഇടംപിടിച്ച ആദ്യ താരമായ പർവേസ് റസൂൽ, ഒരു ഏകദിനത്തിലും ഒരു ടി ട്വൻറിയിലും രാജ്യത്തിനായി ജഴ്‌സിയണിഞ്ഞു. കശ്‌മീരിൽനിന്ന് ഐപിഎലിൽ കളിക്കുന്ന ആദ്യ താരവും പർവേസ് റസൂലാണ്. ദേശീയ ടീമിന് പുറമെ ആഭ്യന്തര ക്രിക്കറ്റിലും അവസരം ഇല്ലാതായതോടെയാണ് സജീവ ക്രിക്കറ്റില്‍ നിന്ന് വിരമിക്കുകയാണെന്ന തീരുമാനം റസൂല്‍ ബിസിസിഐയെ അറിയിച്ചത്.

ആഭ്യന്തര ക്രിക്കറ്റിൽ ജമ്മു കശ്മീരിനു വേണ്ടി നടത്തിയ മികച്ച പ്രകടനമാണ് റസൂലിനെ ദേശീയ ടീമിൽ എത്തിച്ചത്. 2008ലാണ് താരം ആഭ്യന്തര ക്രിക്കറ്റിൽ അരങ്ങേറ്റം നടത്തിയത്. ഫസ്റ്റ് ക്ലാസ് മൽസരങ്ങളിൽ 95 കളികളിൽ 5648 റൺസും 352 വിക്കറ്റും. 164 ലിസ്റ്റ് എ മത്സരങ്ങളിൽനിന്നായി 3982 റൺസും 221 വിക്കറ്റും. 71 ട്വന്റി20 മത്സരങ്ങളിൽനിന്നായി 840 റൺസും 60 വിക്കറ്റും നേടി.

2013-2014 സീസണിലും 2017-18 രഞ്ജി സീസണിലും മികച്ച ഓൾ റൗണ്ടർക്കുള്ള ലാലാ അമർനാഥ് ട്രോഫി റസൂലിനായിരുന്നു. 2012-13 രഞ്ജി സീസണിൽ 594 റൺസും 33 വിക്കറ്റുമായി തിളങ്ങിയ റസൂലിന്‍റെ പ്രകടനം ദേശിയ ശ്രദ്ധ ആകര്‍ഷിച്ചിരുന്നു. ഇതോടെയാണ് റസൂൽ ദേശീയ ടീമിലെത്തിയത്.

2014 ജൂണിൽ സുരേഷ് റെയ്നയുടെ കീഴിൽ ബംഗ്ലദേശിനെതിരെയായിരുന്നു പർവേസ് റസൂലിന്റെ ഏകദിന മത്സരം. പത്ത് ഓവറിൽ 60 റൺസ് വിട്ടുകൊടുത്ത് 2 വിക്കറ്റായിരുന്നു പർവേസിന്റെ നേട്ടം. 2017 ജനുവരിയിൽ വിരാട് കോലിക്കു കീഴിൽ ഇംഗ്ലണ്ടിനെതിരെയായിരുന്നു പർവേസിന്റെ ആദ്യത്തെയും അവസാനത്തെയും ട്വന്റി20 മത്സരം. മത്സരത്തിൽ എട്ടാമനായി ബാറ്റിങ്ങിനിറങ്ങിയ പർവേസ്, ആറു പന്തിൽനിന്ന് 5 റൺസ് നേടി. ബോളിങ്ങിൽ നാല് ഓവറിൽ 32 റൺസ് വിട്ടുകൊടുത്ത് ഒരു വിക്കറ്റ് നേടുകയും ചെയ്തു.ഐപിഎലിൽ 11 മത്സരങ്ങളിൽനിന്ന് 4 വിക്കറ്റും 17 റൺസുമാണ് പർവേസിന്റെ സമ്പാദ്യം.