പുതുവത്സരരാവിൽ ഓൺലൈൻ ഷോപ്പിങ് മുടങ്ങിയേക്കും! ഡെലിവറി തൊഴിലാളികൾ നാളെ രാജ്യവ്യാപക പണിമുടക്കിൽ

പുതുവത്സരാഘോഷങ്ങളിലേക്ക് കടക്കാനിരിക്കെ, സൊമാറ്റോ, സ്വിഗ്ഗി, ബ്ലിങ്കിറ്റ്, സെപ്റ്റോ, ആമസോൺ, ഫ്ലിപ്കാർട്ട് തുടങ്ങിയ മുൻനിര ഓൺലൈൻ പ്ലാറ്റ്‌ഫോമുകളിലെ ഡെലിവറി തൊഴിലാളികൾ നാളെ രാജ്യവ്യാപകമായി പണിമുടക്കുന്നു. വർഷത്തിലെ ഏറ്റവും കൂടുതൽ കച്ചവടം നടക്കുന്ന ദിവസങ്ങളിൽ ഒന്നായ പുതുവത്സര തലേന്ന് നടക്കുന്ന ഈ സമരം ഭക്ഷണ വിതരണത്തെയും അവശ്യസാധനങ്ങളുടെ ഡെലിവറിയെയും സാരമായി ബാധിക്കുമെന്നാണ് റിപ്പോർട്ടുകൾ. തെലങ്കാന ഗിഗ് ആൻഡ് പ്ലാറ്റ്‌ഫോം വർക്കേഴ്‌സ് യൂണിയന്റെയും (TGPWU) ഇന്ത്യൻ ഫെഡറേഷൻ ഓഫ് ആപ്പ്-ബേസ്ഡ് ട്രാൻസ്‌പോർട്ട് വർക്കേഴ്‌സിന്റെയും (IFAT) ആഹ്വാനപ്രകാരം നടക്കുന്ന സമരത്തിന് വിവിധ സംസ്ഥാനങ്ങളിലെ പ്രാദേശിക യൂണിയനുകളും പിന്തുണ പ്രഖ്യാപിച്ചിട്ടുണ്ട്.

തൊഴിലാളികളുടെ ജീവൻ അപകടത്തിലാക്കുന്ന ’10 മിനിറ്റ് ഡെലിവറി’ സംവിധാനം നിർത്തലാക്കുക എന്നതാണ് സമരക്കാരുടെ പ്രധാന ആവശ്യം. ഇതിനുപുറമെ, സുതാര്യമായ വേതന ഘടന ഉറപ്പാക്കുക, അപകട ഇൻഷുറൻസും പെൻഷനും ഉൾപ്പെടെയുള്ള സാമൂഹിക സുരക്ഷാ ആനുകൂല്യങ്ങൾ ലഭ്യമാക്കുക, മതിയായ കാരണം കൂടാതെ ഐഡികൾ ബ്ലോക്ക് ചെയ്യുന്നത് അവസാനിപ്പിക്കുക തുടങ്ങിയ ആവശ്യങ്ങളും തൊഴിലാളി സംഘടനകൾ മുന്നോട്ടുവെക്കുന്നു. പണിമുടക്കിന്റെ ഭാഗമായി ലക്ഷക്കണക്കിന് ഡെലിവറി പങ്കാളികൾ ആപ്പുകളിൽ നിന്ന് ലോഗ് ഔട്ട് ചെയ്യുമെന്നും പ്രധാന നഗരങ്ങളിൽ ഫ്ലാഷ് സ്ട്രൈക്കുകൾ സംഘടിപ്പിക്കുമെന്നും യൂണിയൻ നേതാക്കൾ അറിയിച്ചു.

ബെംഗളൂരു, ദില്ലി , മുംബൈ, ഹൈദരാബാദ്, കൊൽക്കത്ത തുടങ്ങിയ മെട്രോ നഗരങ്ങളിലും കേരളമുൾപ്പെടെയുള്ള സംസ്ഥാനങ്ങളിലെ പ്രമുഖ നഗരങ്ങളിലും പുതുവത്സര ആഘോഷങ്ങൾക്കായി ഓർഡർ ചെയ്യുന്നവർക്ക് വലിയ രീതിയിലുള്ള കാലതാമസമോ ഓർഡറുകൾ റദ്ദാക്കപ്പെടുന്ന സാഹചര്യമോ ഉണ്ടായേക്കാം. അതിനാൽ, ആഘോഷങ്ങൾക്കായി ആവശ്യമുള്ള സാധനങ്ങൾ മുൻകൂട്ടി വാങ്ങി വെക്കുന്നതോ നേരിട്ട് കടകളിൽ പോയി വാങ്ങുന്നതോ ആയിരിക്കും ഉചിതം. ഡെലിവറി ജീവനക്കാരുടെ കുറവ് കാരണം നിലവിലുള്ള പ്ലാറ്റ്‌ഫോമുകളിൽ നിരക്ക് വർദ്ധനവിനും (Surge Pricing) സാധ്യതയുണ്ട്.