കശ്മീരിൽ ഭീകര വിരുദ്ധ നീക്കം നിർണ്ണായക ഘട്ടത്തിലെന്ന് സുരക്ഷാ സേന; അതിർത്തി വേലി മുറിച്ച് ഭീകരർ രാജ്യത്തിനകത്ത് കടന്നത് ഒന്നരക്കൊല്ലം മുമ്പ്! പഹൽഗാം ഭീകരാക്രമണത്തിൽ പങ്കെടുത്ത ഭീകര സംഘത്തെ വകവരുത്തിയെന്ന വാർത്ത ഉടൻ ?

ശ്രീനഗർ: ജമ്മു കശ്‌മീരിലെ പഹൽഗാമിൽ 26 വിനോദ സഞ്ചാരികളെ കൊലപ്പെടുത്തി കാട്ടിലേക്ക് മറഞ്ഞ ഭീകരരെ സൈന്യം കണ്ടെത്തിയതായി സൂചന. സേനയുടെ ഭീകര വിരുദ്ധ നീക്കങ്ങൾ നിർണ്ണായക ഘട്ടത്തിലെന്നാണ് ഇപ്പോൾ സുരക്ഷാ സേന അറിയിക്കുന്നത്. എന്നാൽ ഏത് മേഖലയിലാണ് ഏറ്റുമുട്ടൽ നടക്കുന്നതെന്ന വിവരങ്ങൾ ഇന്ത്യൻ സേന പുറത്തുവിട്ടിട്ടില്ല. സുരക്ഷാ കാരണങ്ങളാലാണ് സൈന്യം വിവരങ്ങൾ ഇപ്പോൾ വെളിപ്പെടുത്താത്തത് എന്നാണ് സൂചന.

വനമേഖലയിൽ ഭീകരരുടെ ഒളിത്താവളം സംബന്ധിച്ച നിർണായക വിവരങ്ങൾ കഴിഞ്ഞ ദിവസം സേനയ്ക്ക് കിട്ടിയിട്ടുണ്ട്. ഭീകരരിൽ ചിലർ ഭക്ഷണം കഴിക്കാനായി സമീപവാസികളെ ബന്ധപ്പെട്ടിരുന്നു. ഇവർ ചില വീടുകളിൽ നിന്ന് ഭക്ഷണം മോഷ്ടിച്ച് കഴിച്ചുവെന്നും സൂചനയുണ്ട്. പലതവണ ഭീകരരും സൈനികരും മുഖാമുഖം വന്നു. കശ്മീരിലെ ചരിത്രത്തിൽ തന്നെ ഏറ്റവും വലിയ തെരച്ചിലാണ് ഇപ്പോൾ നടക്കുന്നത്.

കഴിഞ്ഞ ഏപ്രിൽ 22 നാണ് പഹൽഗാമിൽ ഭീകരാക്രമണം ഉണ്ടായത്. ബൈസരൺ വാലിയിലെത്തിയ വിനോദ സഞ്ചാരികളാണ് ആക്രമണത്തിൽ കൊല്ലപ്പെട്ടത്. കശ്മീരിൽ ഭീകരാക്രമണം നടത്താനായി സാംബ-കത്വ അതിർത്തിയിലെ വേലി മുറിച്ച് ഒന്നര വർഷം മുമ്പ് നിരവധി ഭീകരർ രാജ്യത്തേക്ക് കടന്നതായി സൂചനയുണ്ട്. ഇവരിൽ ചിലരാണ് പഹൽഗാമിൽ ആക്രമണം നടത്തിയത്.