പാകിസ്ഥാൻ സാധാരണക്കാരെയും ലക്ഷ്യമിട്ടു ! ഷെല്ലാക്രമണത്തിൽ രണ്ട് കുട്ടികൾ കൊല്ലപ്പെട്ടു; പാകിസ്ഥാന്റേത് തരംതാണ നടപടിയാണെന്ന് തുറന്നടിച്ച് വിദേശകാര്യ സെക്രട്ടറി വിക്രം മിസ്രി

സൈനിക താവളങ്ങൾക്കൊപ്പം നിയന്ത്രണരേഖയ്ക്ക് സമീപമുള്ള സ്കൂളുകളും ആരാധനാലയങ്ങളും ലക്ഷ്യമിട്ട് പാകിസ്ഥാൻ ആക്രമണം നടത്തിയതായി വിദേശകാര്യ സെക്രട്ടറി വിക്രം മിസ്രി. ഗുരുദ്വാരകൾ, പള്ളികൾ, ക്ഷേത്രങ്ങൾ ഉൾപ്പെടെയുള്ള ആരാധനാലയങ്ങൾക്ക് നേരെ പ്രത്യേക ലക്ഷ്യത്തോടെ പാകിസ്ഥാൻ ഷെല്ലാക്രമണം നടത്തുകയാണെന്നും ഇത് തരംതാണ നടപടിയാണെന്നും വിക്രം മിസ്രി രൂക്ഷഭാഷയിൽ വിമർശിച്ചു.

ബുധനാഴ്ച പുലർച്ചെ നടന്ന കനത്ത ഷെല്ലാക്രമണത്തിനിടയിൽ ഒരു ഷെൽ പൂഞ്ചിലെ ഒരു വീട്ടിൽ പതിച്ച് രണ്ട് കുട്ടികൾ മരിക്കുകയും മാതാപിതാക്കൾക്ക് പരിക്കേൽക്കുകയും ചെയ്തതായി അദ്ദേ​ഹം വ്യക്തമാക്കി. ഷെല്ലാക്രമണത്തിൽ പൂഞ്ചിലെ ഗുരുദ്വാരയും തകർന്നു. ക്രൈസ്റ്റ് സ്‌കൂളിലെ വിദ്യാർത്ഥികളുടെ വീട്ടിലായിരുന്നു ഷെൽ പതിച്ചത്. ഷെല്ലാക്രമണ സമയത്ത് സ്കൂൾ ജീവനക്കാരിൽ ഭൂരിഭാ​ഗം ആളുകളും നാട്ടുകാരും സ്കൂളിലെ ഭൂഗർഭ ഹാളിൽ അഭയം തേടി.

പാകിസ്ഥാൻ പതിവുപോലെ ലോകത്തെ വഞ്ചിക്കാനുള്ള നുണകൾ പടച്ചുവിടുകയാണെന്നും ജനങ്ങൾക്കിടയിൽ മതസ്പർദ്ധ സൃഷ്ടിക്കാനുള്ള ശ്രമം തുടരുകയാണെന്നും അദ്ദേഹം പറഞ്ഞു. സാധാരണക്കാരെ ലക്ഷ്യമിട്ടാണ് പാകിസ്ഥാൻ ആക്രമണം നടത്തിയത്. എന്നാൽ, അത് ഇന്ത്യ ചെയ്തതാണെന്ന തരത്തിൽ വ്യാജപ്രചരണം നടത്തുകയാണ്.