‘ബിജെപിയെ വിശ്വാസയോഗ്യമായ പാർട്ടിയായി ജനങ്ങൾ അംഗീകരിക്കുന്നു’ : പ്രതിരോധമന്ത്രി രാജ്നാഥ് സിംഗ്

ബെംഗളൂരു : ഇന്ത്യൻ ജനതക്ക് പൂർണ വിശ്വാസമുള്ള ഏക പാർട്ടിയാണ് ബിജെപിയെന്ന് പ്രതിരോധമന്ത്രി രാജ്‌നാഥ് സിംഗ്. പ്രധാനമന്ത്രി നരേന്ദ്രമോദിയുടെ കീഴിൽ ബിജെപിയ്‌ക്കുള്ള പിന്തുണ വർദ്ധിച്ചുവെന്നും, ജനങ്ങൾ പാർട്ടിയെ അംഗീകരിക്കുന്നുവെന്നും അദ്ദേഹം വ്യക്തമാക്കി. വിജയ് സങ്കൽപ് യാത്രയുടെ ഭാഗമായി കർണാടകയിലെ കിത്തൂരിൽ നടന്ന റോഡ് ഷോയിൽ സംസാരിക്കുകയായിരുന്നു പ്രതിരോധമന്ത്രി രാജ്‌നാഥ് സിംഗ്. മുഖ്യമന്ത്രി ബസവരാജ് ബൊമ്മൈ, കേന്ദ്രമന്ത്രി പ്രഹ്ലാദ് ജോഷി, എന്നിവർക്കൊപ്പം മറ്റ് കർണാടക നേതാക്കളും റോഡ് ഷോയിൽ പങ്കെടുത്തിരുന്നു.

വടക്കുകിഴക്കൻ സംസ്ഥാനങ്ങളിലെ തിരഞ്ഞെടുപ്പ് ഫലങ്ങളെക്കുറിച്ച് പ്രതികരിച്ച സിംഗ്, മൂന്ന് സംസ്ഥാനങ്ങളിലെയും ഫലങ്ങൾ മൂന്നിൽ രണ്ട് ഭൂരിപക്ഷ സർക്കാരിനുള്ള സാധ്യത വർദ്ധിപ്പിച്ചുവെന്നും പറഞ്ഞിരുന്നു. കർണാടകയിൽ ബിജെപിയെ പരാജയപ്പെടുത്താൻ കോൺഗ്രസിനോ മറ്റ് പാർട്ടിക്കോ കഴിയില്ലെന്നും. കർണാടകയിലെ ജനങ്ങളുടെ നല്ല പ്രതികരണവും ബിജെപിയോടുള്ള സ്‌നേഹവും ഉടൻ തന്നെ കാണാൻ സാധിക്കുമെന്നും രാജ്‌നാഥ് സിംഗ് വ്യക്തമാക്കി