താമരശ്ശേരി കൊലപാതകം: പ്രതികളായ വിദ്യാർത്ഥികളുടെ വീടുകളിൽ പോലീസിന്റെ മിന്നൽ പരിശോധന; ആയുധങ്ങൾ അടക്കം കണ്ടെത്താൻ ശ്രമം; കൊലപാതകത്തിൽ മുതിർന്നവർക്കും പങ്ക് ?

താമരശ്ശേരി: സ്‌കൂൾ വിദ്യാർത്ഥികൾ തമ്മിലുള്ള സംഘർഷത്തിൽ മുഹമ്മദ് ഷഹബാസ് എന്ന പത്താംക്ലാസ്സുകാരൻ കൊല്ലപ്പെട്ട സംഭവത്തിൽ അതിവേഗ നടപടിയുമായി പോലീസ്. പ്രതികളായ 5 വിദ്യാർത്ഥികളുടെ വീടുകളിലും പോലീസ് ഒരേസമയം മിന്നൽ പരിശോധന നടത്തുന്നു. തെളിവുകളും ആയുധങ്ങളും കണ്ടെത്തുക എന്നതാണ് ലക്‌ഷ്യം. റൂറൽ എസ പി, കെ ഇ ബൈജുവിന്റെ നിർദ്ദേശപ്രകാരമാണ് നടപടി. എസ് ഐ മാരുടെ നേതൃത്വത്തിൽ 5 സംഘങ്ങളായി തിരിഞ്ഞാണ് പോലീസിന്റെ പരിശോധന.

കൊലപാതകത്തിൽ ചില രക്ഷിതാക്കൾക്ക് പങ്കുണ്ടെന്ന സൂചനകൾ നേരത്തെ ലഭിച്ചിരുന്നു. ഇതടക്കം അന്വേഷിക്കാനാണ് പരിശോധന രക്ഷിതാക്കളുടെ നാല് മൊബൈൽ ഫോണുകൾ അന്വേഷണ സംഘം പിടിച്ചെടുത്തിട്ടുണ്ട്. മൊബൈൽ ഫോണുകൾ ശാസ്ത്രീയ പരിശോധനയ്ക്ക് വിധേയമാക്കും. പ്രതികൾക്ക് രാഷ്ട്രീയ സ്വാധീനവും ഉന്നത ബന്ധങ്ങളുമുണ്ടെന്ന് ഷഹബാസിന്റെ പിതാവ് ആരോപിച്ചിരുന്നു.

നൃത്തപരിപാടിക്കിടയിൽ ഗാനം നിലച്ചതും ഒരു വിഭാഗംവിദ്യാർത്ഥികൾ കൂക്കിവിളിച്ചതുമായി ബന്ധപ്പെട്ട തർക്കമാണ്. സംഘർഷത്തിൽ കലാശിച്ചത്. ട്യൂട്ടോറിയൽ കോളേജിലാണ് പത്താംക്ലാസുകാരുടെ വിടപറയൽ ചടങ്ങ് നടന്നത്. രണ്ടു സ്കൂളുകളിലെ വിദ്യാർത്ഥികളാണ് ചേരിതിരിഞ്ഞ് ഏറ്റുമുട്ടിയത്. സംഘർഷത്തിൽ ഷഹബാസിന് ഗുരുതരമായി പരിക്കേറ്റ് കോമയിലായിരുന്നു. തുടർന്ന് ചികിത്സയിൽ ഇരിക്കെയാണ് ഷഹബാസിന്റെ അന്ത്യം.