പെണ്‍കുട്ടിയെ തെങ്കാശിയില്‍ കൊണ്ടുപോയി പീഡിപ്പിച്ചതായി കെസിഎ മുൻ കോച്ച് കുറ്റസമ്മതം നടത്തിയതായി പോലീസ്; നഗ്ന ചിത്രങ്ങൾ പകർത്തിയത് ബിസിസിഐയ്ക്ക് നൽകാനെന്ന് തെറ്റിദ്ധരിപ്പിച്ച്

തിരുവനന്തപുരം : ക്രിക്കറ്റ് മത്സരത്തിനെന്ന പേരില്‍ പെണ്‍കുട്ടിയെ തെങ്കാശിയില്‍ കൊണ്ടുപോയി പീഡിപ്പിച്ചെന്ന് കെസിഎ മുൻ കോച്ച് മനു കുറ്റസമ്മതം നടത്തിയതായി പോലീസ്. കന്റോണ്‍മെന്റ് പോലീസ് തെളിവെടുപ്പിനായി തെങ്കാശിയില്‍ എത്തിച്ചപ്പോഴായിരുന്നു പ്രതിയുടെ കുറ്റസമ്മതം. നിലവിൽ 6 കേസുകളാണ് മനുവിനെതിരെ ചുമത്തിയിട്ടുള്ളത്. നിലവിൽ തെളിവെടുപ്പിന് ശേഷം മനു ജുഡീഷ്യല്‍ കസ്റ്റഡിയില്‍ റിമാന്‍ഡിലാണ്.

തെങ്കാശിയിലെ ലോഡ്ജില്‍ വച്ച് പെണ്‍കുട്ടിയെ ലൈംഗികമായി പീഡിപ്പിച്ചുവെന്നാണ് മനു പോലീസിനോടു പറഞ്ഞത്. എന്നാൽ മറ്റു പെൺകുട്ടികളെ പീഡനത്തിനിരയാക്കിയിട്ടില്ല എന്നാണ് ഇയാൾ പറയുന്നത്. ഇക്കാര്യം പോലീസ് വിശ്വാസത്തിലെടുത്തിട്ടില്ല. പെണ്‍കുട്ടികളുടെ മൊഴികളും സാഹചര്യത്തെളിവുകളും വച്ചാണ് കേസെടുത്തത്. മനുവിന്റെ ഫോണ്‍ ഫൊറന്‍സിക് പരിശോധനയ്ക്ക് അയച്ചിട്ടുണ്ട്.

2018 ല്‍ നഗരത്തിലെ സ്റ്റേഡിയത്തില്‍ പരിശീലനത്തിന് എത്തിയപ്പോഴാണ് പെണ്‍കുട്ടിക്ക് ദുരനുഭവമുണ്ടായത്. ഭീഷണി കാരണം പെണ്‍കുട്ടി വിവരം പുറത്തു പറഞ്ഞില്ല. പിന്നീട് മറ്റൊരു സംസ്ഥാനത്തേക്കു താമസം മാറി. അടുത്തിടെ നഗരത്തിലെ സ്റ്റേഡിയത്തില്‍ മത്സരത്തിനെത്തിയ പെണ്‍കുട്ടി മനുവിനെ കാണുകയും പ്രതികരിക്കുകയും ചെയ്തതോടെയാണ് സംഭവം പുറത്തറിഞ്ഞത്. പീഡനക്കേസിൽ ഇയാളെ പൊലീസ് പിടികൂടിയ വാര്‍ത്ത കണ്ട് കൂടുതല്‍ പെണ്‍കുട്ടികള്‍ പരാതിയുമായി മുന്നോട്ട് വരികയായിരുന്നു. നൽകിയത്. പെണ്‍കുട്ടികളെ ക്രൂരമായി ഉപദ്രവിക്കുകയും നഗ്നചിത്രങ്ങളെടുത്ത് ഭീഷണിപ്പെടുത്തുകയും ചെയ്തുവെന്നും പരാതികളിൽ പറയുന്നുണ്ട്. ബിസിസിഐക്കും കെസിഎയ്ക്കും നല്‍കാനായി ശരീരഘടന മനസ്സിലാക്കാനെന്നു തെറ്റിദ്ധരിപ്പിച്ച് നഗ്നചിത്രങ്ങളെടുത്തെന്നും ഇതു കാട്ടി ഭീഷണിപ്പെടുത്തി ചൂഷണം ചെയ്തെന്നുമാണ് പരാതികളില്‍ പറയുന്നത്.